Ka Bombay High Court ynne da pynkut ko yaka mukotduma PIL wa da yaleh da ki soo ngut kiwa dang lai puræ aiñ kiwa da pyrchah yei pynbna ka sorkar Maharashtra yow pynbna yaka 22 tarik uni u bnai kam ka sngi chuti neibynta i pynkyntang yaka Ram Mandir ha Ayodhya.
Ka Special Bench wa kynthup ya u Justice GS Kulkarni waka Justice Neela Gokhale da ong ki wa ka ri India toh kawa em boon tylli ki niam wei i rai ka sorkar jylla toh kawa pynoo wym em leh chilliang ya kawon kawon ka niam wei ki sorkar jylla em ki i bor wow pynbna sngi chuti.
Ka Bombay High Court da kdaw ko leh yaka hukum wa da pynmih da ka Kerala High Court wa em kiwa pyrchah yei e chuti ya kiwa lai puræ yow ye ki u chimbynta haka Ramzaan deiwa ong wa jar jiar ki jylla em ki jar jiar ki niam wei i e chuti ym em ktah ko yaka Article 25 wa 26 ka Constitution.
Da kdaw leh wot ka Supreme Court da ong ko wa i pynbna sngi chuti toh iwa chong ha ki bor sorkar.
Kiwa yaleh PIL da ong ki wa u pynbna chuti neibynta u leh niam pynyoo ko wa em i leh chilliang wei man ko leh pyrchah yaka Constitution. Deiwa ong wa ka sorkar ymtoh u pynyoo ko wa yachah ko ya kawon kawon ka niam.
Kam kani ka jooh ka mukotduma da em leh wa leh ha Madras High Court kiwa pyrchah yei e chuti chiteiñ sngi kawa da pynkut ynne hi deiwa pynman da ka Special Hearing deiwa pyntikna wa ki Hospital ym duna bru wakreh ki wei u pdiang ya kiwon kiwon kiwa kjut wa chitom ha ini i por wa e chuti chiteiñ sngi.
Ka Bombay High Court hawa pynrem ya kani ka PIL da ong ko wa khyrngiat ko u sñiaw wa em ki bru wa em kam ini i mynsien wow pynbaad boon jait wei da yoo lakam wa i leh Politics wei i kwah wow bna naam donhi.
Discussion about this post