Ka chnong Panaliar, Jowai da yaleh chitom bha ko waroh kawi hei wow yakrehlang wa ka sorkar nadooh Central hadooh State heiyatoh wow pyrchah ya u khñiang COVID-19 deiwa khang ya ki thawmih thaw psiah heijooh i por u bood ya ki aiñ kiwa dabooh ka sorkar.
Kamtæ, heiyatoh wa ki kaam chnong, kiwa mut u leh ha u bnai April, kam ka pynyoo Film, ka 7-A Side Football Tournament, ki kaam yonglang waroh da pyndam heini ipor. Neitæ won ka Bamphalar 2020 kawa mut u man ha ka 4, 5 wa ka 6 tarik u May 2020 leh da pyndam deiwa booh tarik won ha ka 29, 30 u April 2021 wa ka 1 May 2021.
Hajrong kini waroh, hanla ka sorkar darap pynyinsur ko yaka Curfew weiwa dachah ko u lai likreh likhih ki kreh sorkar. Ka chnong Panaliar, Jowai dang pyn-eh hi ko yei mih i psiah kiwi tawan ki baar chnong chapoh chnong yong ka, ki kreh chna yung chna sem, e rong yung wa kiwi ki jait kreh leh, ym pu chah wow wan kiwa na kiwi tawan ki chnong u likreh chapoh ka chnong Panaliar. Khang pyrchah ko ya kiwa khwe, kiwa tong doh cha loom chawah hapoh u pood u saam yong ka, deiwa maham, wa lada chem ya kiwon kiwon kiwa leh pyrchah, chisyndon u kem deiwa u e kti cha ka aiñ pulit, weiwa ka chnong ym em bahkhlieh ko ya kiwon kiwon kiwa pyrchah.
Chooh chooh ki sngi man yaw, u man ki kamjooh hi ha ka Wednesday wa ka Saturday heiwa, ki dukan wa ye u chongdai næ u wai toh du kitu donhi kiwa da tip da ka chnong.
Kamtæ khut ko yei yakrehlang yong waroh kiwa najan najngai, ki para jan chnong, heijooh i por ya ki khon ka chnong leh, neibhah wymhoi u kheiñke i ya uni u khñiang kjut COVID-19, neibynta yong samen, neibynta ka yung ka sem, neibynta ka chnong ka thaw wa ka ri hi waroh kawi.
Ka khubor na u Riquoma Rq. Laloo, Waheh Chnong, Panaliar, Jowai.
Discussion about this post