Ka Lockdown wa da pynkrehkaam da ka sorkar kawa da sdang ha East Khasi Hills da krehkaam pura ko ynne ka sngi, heiwa da sakhi leh ya i kyrchaan na ki paidbah, hanla i pynbna yong ka sorkar man i iwa syndet syndet wei da ktah ya kiwa boon.
Hawa lai pait ha kylleiñ ka nongbah Shillong, da sakhi yei lyngam ki sarok, wei ki bor wa pait nadooh ki pulit wa Magistrate kiwa em ha ki sarok ym em e laad ki ya ki paidbah wow lai khlem da em ki daw kiwa biang, wei da yoo leh yei pynrkhiñ wa joor bha ha i lai ki kari wa ki bru.
Da yoo leh yei ksoh ki pulit ya ki kari yow takit yei mih i yong ki wei wow pyntikna wa em ki ya ki Car Pass næ i pynsakhiat ya ki kaam wa lai ki, neiliang ki pulit da ksoh ki leh ya ki bru kiwa mih cha sarok wei ym chah hiwot ya kitu kiwa mih khlem ki daw kiwa biang.
Ha i lai pait da chem leh wa ha ka thaaiñ Polo, u Magistrate da pynjæd ya i Pass yong kawi ka Scooty neidaw wa pynemkaam bakla.
Kam wow pynkynmoo wa ka sorkar ynnin ka sngi da pynbna ko da ka Lockdown ha waroh kawi ka East Khasi Hills District neibynta wow kdoh u khoom yei ku kiwa yabi ya u khñiang COVID-19 ha ka jylla, heiwa da pynbna leh ya ka Lockdown ha ki sngi kut tayaw. Kani ka Lockdown da pynkrehkaam ha East Khasi Hills nadooh ynnin i miet 8 waje, kawa daw neh hadooh 5 sngi, heiwa ka sorkar daw pait chwa ko yei long i man ha kini ki sngi chwa wow chim da kiwi ki rai.
