Ka Eco-Friendly Crematorium namo ka Khnap Thangbru kawa pynemkaam yow pyndep niam thang ya kiwa da khlaad, kawa da yarap chiboon u pynduna yei lut i por, u pynduna yei lut ki dieñ, u lait nei tdem wei kawa da pynemkam katni ha kylleiñ ki thaw ka jylla, toh kawa da chem da u tynde u Kambel Shullai uwa da kha da chong da sah ha Jowai, kamtæ ynne ka sngi kawa man ka lyngkhooh sngi yap wa 13 snem yong oo, neiliang ka Seiñraij Jowai kam ka dak u pynsah yei naam i burom yong oo, da wai ko ya u mot dur sah naam u uwa da chna hajan ka Khnap Thangbru wa em ha Dulong Pohhali, Jowai.
Ya uni u mot dur sah naam da wan wow wai da u Symbood Montri Rangbah ka sorkar jylla, u Sñiawbhalang Dhar chirup u MLA ka thaaiñ, u Wailadmiki Shylla, hei emlang u R.S. Gill, IFS, PCCF & Head of Forest Force Meghalaya, u MDC ka thaaiñ, u Moonlight Pariat, kiwa yahkhmat ka Seiñraij Jowai, ki Dolloi, kiwa yahkhmat Niamtre na ki Raij waphær waphær ka Ri-loom Jaiñtia, kiwa chah khut sñiawbha wa kiwi.
U Wailadmiki Shylla hawa klam ong u, hei im kam ki bru yoo i chiboon ki buit stat wa chem thymme tangwa boonsien yoo i kiwon kiwon ki bru wa pyrkhat hajrong ki buit wa chem thymme booh ki yei myntoi samen hakhmat ym neibynta ki paidbah.
Deiwa e yaroh ya u tynde u Kambel Shullai uwa em i yoo jngai yei eh i khoo ki khon ka Niamtre neibynta u pyndep yaka niam wa khaddooh deiwa thang neibhah chimpor ko boon kynta najrong wa joor i tdem wei lutphut ki dieñ. Da sñiaw sarong u ya uni u waheh wa dei chem yong oo da man i kyrkhulang ya waroh, wei kam ka pateiñ wa chadien i burom wa khroo wow su kylliang ya oo toh u rah yei naam i pyrtuid yong oo wei u yada yaka bei rymaw.
Neiliang u kongsan, u Sñiawbhalang Dhar ong u uni u bru man u kam u Scientist næ u bru chemphang wa phær bha da ki dak kaam yong oo, wei i sakhiat hi boonsien hei manbru jooh dooh kyrmen i ha wym em yei stat, tangwa i stat wei tip yaphær bha i, wei iwa u Kambel Shullai em u toh i tip wa kyrpang wa da ye u pynmankaam u yeini i buit phylla wa kyrpang.
Hawa kynmoo tamdien u ya ki por wa jooh ya chong parom u wa u Kambel Shullai kam u lok wa jooh ya maya bha ki nachwa, ong u man iwa suk wow ong wa toh u bru wa stat tam, tangwa iwa eh won ha i wa kammon u em i yei mynsien yaichah hadooh wow pynjop yeini.
Chooh chooh ong u wa uni toh uwa yahkhmat wa stat tam wa ye u wow rah yei naam i burom yong ka Ri-loom Jaiñtia wei wa man haroh u u bru wa yaichah deiwa rai u chah yap pynmankaam yei buit neidaw wa kwah u ya ka pateiñ wow wan u suk ko.
Ha kani ka sngi ka Seiñraij Jowai da pynkup burom haroh ko ya kiwa ha-yung ha-sem u tynde u Kambel Shullai nadooh ka kurim yong oo wa ya uwa pynwandur yei dur u mot sah naam u.
Discussion about this post