Ka JSU War Jaiñtia Circle waka Syndai Unit deilang wa ki bor chnong da hiar ki wow kynreh naphang ya kiwa na baar ri wa ki wym toh napoh ka jylla kiwa da wan buhai chnong hapoh ka chnong Lakroh.
Ki dkhot ka seiñ deiwa emlang ki bor chnong da phah sai ki ya ki kot ki sla yong kini kiwa da thooh laad wow chong chnong mynkna wei wow kreh hapoh ka chnong Lakroh kawa em hapoh ka Amlarem Sub-Division hajan wa u pood ka ri Bangladesh.
Neiliang kiwa yahkhmat ka JSU hadien wa da tip na ki tre chnong wa kini ki bru wa em hapoh ka chnong da thmu ki wow chna sa ka Mandir wa heh hapoh u pood u ang ka chnong khlem da yoh bor na ki bor chnong, ka seiñ da ye ko u pynsangeh syndon yeini i chna wa da man pyrchah aiñ wei iwa da leh embor da kini ki baar ri baar chnong.
Ka JSU ryngkat wa ki bor chnong daw chong pyrkhat wei wow khana cha ki bor ka aiñ yow khanglaad ya ki dkhar kiwa poi hi-eh yow buhai chnong wei ka seiñ da beh ko leh ya kitu ki wym em hok wow chong u sah hapoh ka chnong wa hapoh ka thaaiñ hi waroh kawi.
Ka seiñ da pynsñiaw ko leh yei sñiawngooh ya kiwa yahkhmat chnong ka Lakroh kiwa smat wow pyntip cha ka seiñ wei wow ya krehlang u beh ya kini ki bru na ka chnong wei ka seiñ da kyntu ko kiwi leh ki dkhot ki bor chnong hapoh ka Bri U Ynñiawtrep wow mih ki chakhmat wow ya krehlang wa ki seiñbhalang wa ki bor ka aiñ khnang wow yoh u khanglaad na ini i wan chong chnong kiwa na baar.
Discussion about this post