Khliehriat: Ka Khasi Students’ Union – Jaiñtia Hills District ha ka 23 tarik uni u bnai da lai yachem kyrpang ko ya u DC ka East Jaiñtia Hills District u F.M. Doph heiyatoh wa i thmu yong ka karkhana Star Cement, Lumshnong wow phah yaleh Aadhaar ya waroh ki baar jylla kiwa kreh ha kani ka karkhana kawa toh u sdang nadooh ka 25-26 tarik uni u bnai.
Ka KSU-JHDU ynne ka sngi hapoh i yahkhmat u President ka seiñ u Ohibait Dkhar wa u Leningrad Tariang uwa man kam u Organising Secretary, u Streamly S Niangti uwa man kam u Chairman Employment Cell wa ki dkhot da lai sylli ki ya kani ka thaw wa thmu wow pynsiah pyrtuid ha u Aadhaar wei neiliang u khlieh yong kani District da pyndam noh u yei thmu kani ka karkhana wow leh sop sop wa ki Agency wow leh Aadhaar ya kiwa kreh yong ka.
“I e Residential Certificte da ki Company ki bru samen ya ki baar jylla wa kynthup ya kitu ki wym psiah hapoh ka NRC yong ka jylla Assam da wailaad ko wow wai Bank Account wow yoh PAN Card wei da booh ko hei maa wa khroo ya ka jaitbru wei kini ki bru wa yaleh Aadhaar toh kiwa thmu wow man kam ki tre ri wa paka ka ri India da ki luti thok,” da ong u Ohibait Dkhar.
U Organsing Secretary won da ong u wa lada kwah kini ki bru wow yaleh Aadhaar toh u lai yaleh ki na ki chnong yong ki hi wei ymtoh u yaleh buit-tooh lang wa kini ki Company.
Ka seiñ da maham ko leh ya kiwi ki Company wa thmu wow leh ya ini i jooh i kaam wei da maham ko leh ya ki dkhar wa chim kur ka jaitbru u Ynñiawtrep.
Discussion about this post