Jowai: Ka Khasi Students’ Union (KSU) Narpuh Circle ynnin ka sngi ka 17 tarik hapoh i yahkhmat u President u KS Suchiang, u Sanatomba Bamon, General Secretary, ki dkhot wei emlang leh ki dkhot ka KSU Huroi Unit da lai pynsangeh ki yei pynkreh kær pood waka ri Bangladesh ha Huroi. I daw wa pynman ya ka seiñ wow pynsangeh ya ini i kær sainar wa i kreh sarok toh wa neidaw wa ka Company NBCC wa pynkreh ya u sarok khappood wa i kær sainar wa ka sorkar jylla ym pu em su ki ya i bai lutsan (Compensation) cha ki tre thaw wa chah ktah ki thaw yong ki na ini i pynkreh.
Ka KSU Huroi Unit da dep pynsangeh ko chisien ya ini i kreh ha ka 29-11-2018, tangwa ki bor synchaar District lyngba ka yung krehkaam u Deputy Commissioner EJHD da kular ki wow su ya ka bai lutsan wei da kyrpaad ya ka seiñ wow e laad ya katai ka Company wow kreh ya ka kaam.
Hadien wa ki tayaw ki bnai dang lai ki, ka seiñ ym yoh ko kawon kawon ka jubab na ka sorkar næ na ka Company NBCC, ini da pynchrai ko ya ka seiñ wa ki tre thaw kiwa ym neh chah de ya ini wa chukor ka sorkar wei ka seiñ ym yohsa de ko wow phah khang wow pynsangeh chisyndon ya katai ka kær pood wa i chna sarok.
Ka seiñ ha i lai pynsangeh ya i pynkrehkam da chem ko wa i kær pood man ki kawa da lai chait chait chakhmat, tangwa ki tre thaw wa chah ktah ym yoh ki yei su tang chi anna leh.
Ka seiñ wa ki tre thaw da chim ki leh ya ka rai wym e laad ya katai ka Company wow lai chakhmat ya i pynkreh kat wym pu yoh ya i dawa. “I dawa i ya ka hok, ka Company NBCC wa ka sorkar ym em hok ki wow leh embor næ thom da i bor”, da ong u General Secretary ka KSU Narpuh Circle u Sanatomba Bamon.
Kani toh katkam ka kyrwoh na u Publicity Secretary KSU Narpuh Circle, u SL Suchiang.
Discussion about this post