U MLA ka BJP na Pynthorumkhrah, u A.L. Hek da ujor wei pyrchah joor u yei thmu ka sorkar India wow pynkylla ya ka aiñ Foreign Contribution (Regulation) Amendment Bill, 2026, neibhah wa daw ksih wei pynrkhiñ sbak yei yarap na baar ri cha ki seiñ niam khamtam daw ktah ko ya ki Christan ha ka jylla.
U Hek da ong u wa ini i pynkylla ka sorkar India daw ktah joor yei krehkaam ki seiñ kiwa kreh kattæ neibynta i bha i miat ka imlang sahlang ha Meghalaya wa ha ka Northeast.
Da ong u wa ki seiñ kreh monsñiawbha khlem da yoh nong wa ki seiñ niam da wanrah ki chiboon i myntoi ha ka imlang sahlang kam hei puræ puthi, i chait i khiah wa ki kaam pynroi ha ki thaaiñ palatsor wow e bor ya kiwa chong chnong.
Da ong u wa kini ki seiñ da krehkaam ki deiwa bood ryntih ya ki kyndon ka aiñ wa kynthup ka FCRA.
Hawa pynsñiaw yei sñiawkhia hajrong ini, u Hek da ong u wa i pynkylla ya ka FCRA daw ktah joor ko yei krehkaam kini ki seiñ khamtam i bor wa man laitlooid ki.
Da kyntu u ya ka sorkar wow bichaar bniah yeini deiwa khutlang wow ya phyllu deilang ki seiñ waphær waphær yow wanrah ya ki kyndon kiwa che.
Hadien wa dep phah u MLA ka jylla yei ujor deiwa e dei thoh, ha ka 1 tarik uni u bnai da pyntip da ka sorkar pyrdi wow pynsangeh noh chwa u wanrah ya ka Amendment ha ka FCRA Bill. Hawa kylli, u Hek da ong u wa hadien wa tip yeini wa da pynsangeh da chim toh i kyrkhu u Blai neibhah kiwa boon da duwai ki neibynta ini heiwa da mankaam i.
Ha ka 1 tarik hadien wa joor i pyrchah, neiliang u Parliamentary Affairs Minister, u Kiren Rijiju da pyntip u hapoh Lok Sabha wa ka sorkar ym wanrah ko yei thmu wow pynkylla ya ka aiñ FCRA. Deiwa ong wa ka Liang Pyrchah kwah ko wow yahbakla ya kiwa chong chnong ka Kerala wa hapoh ka ri neidaw wa katæ em ki Election hapoh kiwa boon ki jylla.
Ya kani ka Bill da tyrwa nyngkong ha ka u bnai March deiwa ong wa emkaam wow yada ya ka ri na kiwa thmu wa sih da kiwa na baar ri wei i pynkylla ym em man ko pyrchah ya kawon kawon ka niam næ ka seiñ.
Ha i thmu wow pynkylla da em ka kyndon wa ong wa lada chem ya kiwa tyngkheiñ ya ka aiñ, daw chimkti ki bor sorkar ya waroh wa yoh iwa wan na baar ri.
I pyrchah ya kani ka Bill da mih i na kiwa boon nadooh ki MP khamtam na Kerala wa na Tamil Nadu heiwa u Chief Minister, u M.K. Stalin ynne ka sngi leh da thoh u cha u Prime Minister Narendra Modi wow pyrchah yeini deiwa ong wa u Modi da jooh lai chibynta u ha ki yalang wa da pynman ki Christan wei da yaroh u leh ya kiwa boon ki kaam wa bha heiwa da yoh myntoi kiwa dooh wa duk nadooh ka puræ puthi wa ha ki kaam sumaar sukhær.
Ha kawi won ka liang, u Hek uwa da jop 6 sien kam u MLA, da kyntu u ya ki MP na ka jylla wa ka thaaiñ Northeast wow ya krehlang ki hajrong kani ka kaam neibhah wa ki MP kiwa ye wow yatai ha Parliament.
Discussion about this post