Ka seiñ UHM-East Jaiñtia Hills District Unit ynne ka sngi da lai e dorkhat ko ha u Deputy Commissioner ka East Jaiñtia District, wow pyrchah joor ya ka sorkar MDA-II wa yahkhmat da ka NPP kawa emlang ka UDP, HSPDP waka BJP hajrong i thmu wow wanrah luti rel ha Ri-loom Jaiñtia.
Ka seiñ da klam che ko wa lada ka sorkar ympu ye ko wow pynkrehkaam ya ka ILP wa MRSSA kiwa man ki stieh yada ya ka jaitbru na i wan psiah tooh ki baar jylla, toh u sangeh chwa ka luti rel, wei lada ka sorkar kwah luti rel emkaam wow pynkrehkaam chwa ya ini i dawa.
Da ong leh wa emkaam ya kini ki aiñ neibhah ka Meghalaya toh kawa dang sahdien wei kawi na ki jylla wa khian dooh hapoh ka ri kawa em du kattu katni lak donhi ki tre chnong wei emkaam wow yada yaka dustur riti wa i rukom im tangwa hanla da em ka Sixth Schedule dang emkaam sa ka ILP kawa ym ye u pynkrehkaam hadooh katni hanla da chim ya ka rai namo ka Resolution da ka sorkar ha u snem 2019.
Kamtæ da ong wa lada kyruiñ won cha ka East Jaiñtia Hills District toh kawa duna bru bha kawa em 1,22,030 ngut donhi katkam ka Census 2011 wei em pood ko leh waka ri Bangladesh iwa da yang chwa i maa ya ki tre chnong wei lada wan sa ka luti rel daw ktah chooh chooh ko ya kiwa chong chnong ka District.
Kamtæ da ong wa toh u pyndam syndon ya ini i thmu wow wanrah yaka luti rel kat wym pu em ki aiñ wa khlan kam ka ILP.
Da dawa leh wow pyndap pynbiang chwa yeiwa emkaam ka District nadooh ka puræ puthi, ki sarok, ki thaw sumaar, ki laad yoh kreh, i pynbait pood wei wow pynchna noh ya u sarok NH6.
Discussion about this post