Jowai: Ki pulit ka Amlarem hapoh i yahkhmat u Sub-Divisional Police Officer (SDPO) u Donkupar Moksha ynne ka sngi kawa man ka sngi wa wai ki dukan ha kani ka chnong, da pynsap ki da ki Mask ya kamwa 300 ngut ki bru kiwa wan yaw khlem deiñ Mask.
Hawa yaklam wa u Donkupar, da ong u wa da leh yeini kam chibynta wow pynsñiawthooh ya ki paidbah wa i sap Mask cha ki thaw paidbah man i iwa emkaam bha khamtam ha kini ki por wa em kani ka khlam u COVID-19.
Ki pulit manda chem ki wa em ki bru kiwa mih khlem Mask da khut ki ya ki wow pynsap ya ki ya ki Mask wow pynsñiawthooh yei emkaam wow yada ya i de deiwa sap Mask.
Ha kini ki sngi wa dadep ki pulit da saam ki hadooh kamwa 500 tylli ki Mask wa da soor dei kyrmen wa ki paidbah u chimkhia ki wow yada pynyaki hi wa ya kiwi leh kamjooh.
Discussion about this post