Ka seiñ KSU West Jaiñtia Hills District hapoh i yahkhmat yong u President, u Laitphar Syngkrem wa u General Secretary, u Leningrad Tariang da lai yachem ki ya u Deputy Commissioner ka West Jaiñtia Hills ha ka 17 tarik uni u bnai hadien wa ka seiñ da chem ko wa ka sorkar Assam kheiñ jhep ko ya iyi iyi wa da yaklam wa ka sorkar Meghalaya hadien i jia wa sñiawsih ha Mukroh ynnin u snem.
Ka seiñ da ong ko wa ka sorkar Assam da pynsmat pathan ko wow chna ya ka yung krehkaam ka chnat Forest yong ka kawa da chna pyrchah aiñ ha Mukroh deiwa chna pynheh ya kani ka yung krehkaam wei da chna leh ya u sarok cha Samatan wei iwa da pynchrai ya ka seiñ toh wa ka sorkar Assam da pynsih ko ya ki luti lai bri lai lyngkha ki paidbah deiwa tih da ki thlu wei da pynoor da ki dieñ heh hapyrdi luti.
Neiliang u DC da ong u wa da tip u ya ini wei da kular u wow chimkhia wow yachem wa ka DC yong ka Karbi Anglong kamjooh leh wa u DIG yong ka Karbi Anglong ha ka 27 tarik uni u bnai wow yaklam ya kiyi kiyi kiwa jia ha kini ki sngi wa dadep wei wow khanglaad ya ka Assam wym wan pyndik næ tuklar de chapoh ka jylla lane ka bri yong i.
Ka seiñ da ong ko wa daw yang ko ya kani ka tarik wa da booh u yaklam hapyrdi ka Assam wa Meghalaya wei lada i yaklam ym mihsoh wei lada ka sorkar Assam u pteiñ ko wow pyndik ya ki paaid wa chong chnong yong ka Bri Ynñiawtrep kiwa chong wa sah cha ki thaaiñ khappood ka Block-I, ka seiñ ym yohsa ko wow chim da kiwi won ki laad ki luti wei ka sorkar toh u chim ko yei bahkhlieh.
