Pynskem ka High Court yaka hukum phah kset ya uwa slaitbor yaka khynnah ha Ladrymbai

Uwi u bru wa tip kam u Kanu Das uwa da dep chah rai pynrem haka yung bichaar u Special Judge (POCSO), East Jaiñtia Hills District haka hukum wa da pynmih haka 08-04-21 deiwa phah kset ya oo 10 snem deilang waka kuna kawa Rs. 10,000 wei lada ym su u ya kani daw hap chong patok u sa chi snem hadien wa slaitbor u ya kawi ka khynnah wa dang 8 snem, da lai yaleh mukotduma u hakhmat ka Meghalaya High Court yow tynyap ya kani ka hukum.

U Kanu Das toh uwa da chah ujor FIR haka 03-03-16 ha Ladrymbai Police Outpost wei da chah rai pynrem u hapoh ka Section 5 (m) wa Section 6 ka aiñ POCSO 2012.

Neiliang u muktiar u Kanu Das da yasaaid u wa waroh kiwa chah pynbaad u toh kiwa da chna hi-eh wei ym em da takit bniah ya kiwa tip yeini i kaam nadooh yaka beipun kani ka khynnah deilang waka bei ko kawa da e FIR wei da ngait donhi yeiwa da khana kani ka khynnah.

Chooh chooh da yasaaid deiwa ong leh wym em sabut wa chah salitbor sakhiat kani ka khynnah neitæ iwa ong ki Doctor ym ye wow chim kam iwa tikna hanla ong ki wa em hi i chah slaitbor.

Kani ka khynnah won hawa kylli takit yaka da ki pulit da khana ko kammon jia yaka heiwa uni u bru da looid patlun u wei da slaitbor u ka iwa da jia hei step ka 03-03-16 deiwa nyngkong rahbor u ka cha iwi i khloo nakhmat i dukan ka beipun ko wa em ha Ladrymbai heipor waka beipun ko ym em ko hapoh dukan wei heipor wa slaitbor u ka da tymmoh u leh yei ktien ko.

Related posts

Tkut waroh ki chaka dien ka Truck kawa noh na yingkieñ chapoh ka wah

January 11, 2026

Khut ka kur Pale ya ki khon ka kur wa lehbha hei puræ puthi yow pynkup burom

January 11, 2026

Ka yung bichaar da kdaw ko leh wa kani ka khynnah kut wa takit yaka da khana ko yei jooh bait iwa jia yaka khlem da pynkylla wot hakhmat ka yung bichaar wei kam ka khynnah wa dang 8 snem ympu tip ki wow thok manda jia kam ini ya ki.

Neiliang ka yung bichaar da kdaw ko leh yaka Medical Report kawa da pyntikna yei chah slaitbor kani ka khynnah kiwa da chem leh yei takha ki bynta kynthai kani ka khynnah.

Kamtæ hadien wa bichaar ya waroh ki sabut deilang wa ki mukotduma wa sariem wa kam kani, ka Meghalaya High Court da rai ko wow pynskem yaka hukum phah kset wa 10 snem ya u Kanu Das deilang ka kuna wa da phah su wei da phah ya oo wow su u leh Rs. 3 lak cha kani ka khynnah lada ym pu em dep su u.

Ya kani ka hukum ka High Court da pynmih haka 27 tarik uni u bnai.