Ynnin ka 30 tarik ka Jaiñtia Student Movement, ha ka lyngkhooh dap 160 snem wa khlaad u Khlawait ka Ri-loom Jaiñtia, u Kiang Nangbah da pynskem wei da e ya ki kyntien kular yong kiwa kitkaam ka CEC ka seiñ neibynta ka samoi kaam 2022-2025.
I e ya ki kyntien kular da leh khnang ha kani ka sngi kam ka dak wow kynmoo warom ya u Kiang Nangbah wa i mynsien yaleh wow yada ya ka jaitbru.
Wow pynkhroo chooh chooh ya kani ka sngi da em leh i lai Rally ki thuk-thuk wa ki kari yong ki dkhot ka JSM wa wan chimbynta na kylleiñ ka Ri-loom Jaiñtia kawa sdang na madan Mihmyntdu ter-ter ka sor Jowai hadooh wa poi ha Madan Yong Ka Skot hajan Syntu Ksiar heiwa da yoh ya ki chaad tynre waphær waphær kam i Chaad Pliang, Pastieh wa kiwi kiwi kamjooh ka yah thuk-thuk Motocross.
Ha kani ka sngi da yoh leh i klam na u Lamphrang Kharbani, President HANM, u Dr. H.H. Mohrmen, uwa da batai chaphang i yaleh u Kiang Nangbah wei da yoh leh i klam na u Soni Bareh wa na u Phasmon Dkhar, EM ka JHADC uwa man kam u Political Adviser ka JSM, uwa da e mynsien wei kyntu leh ya kiwa kitkaam wa thymme ka seiñ wow kreh hok ki neibynta ka jaitbru.
Ha i klam wa tbian u General Secretary, u Roitre Dkhar da khana u wa ka seiñ da dawa ko nadooh u snem 2015 ter-ter wow pynku kyrdan ya ka Kiang Nangbah Government College ha Jowai wei wow booh sa kawi ka Government College ha East Jaiñtia khnang wa ki manyung wa duna ha i yoh i laa u yoh ki u phah puræ ya ki khon wei da e leh chiboon ki dorkhat cha ka sorkar jylla hajrong ini wei wow booh ya ka Coaching Center ha Jowai wa ha Khliehriat neibynta ki Civil Services Exam nadooh UPSC, MPSC wa DSC wei kamjooh wow e sikai ya ki khynroo wow ye ki u seiñ kreh.
Neiliang u Leningstar Rymbai, da kyntu u ya ki dkhot ka seiñ wow kreh dei bor dei mynsien neibynta i yap i im ka jaitbru, wei da maham leh ya kiwa pynchah pyrtuid namo kiwa leh Benami iwa da pyntlot wei pynswe wei da pynhiar ar sut i ya ka jaitbru.
Da kyntu u leh ya ki dkhot wa ka jaitbru wow yakhun pyrchah ya kiwa dai drugs wa da ktah chiboon ya ki khynnah khynroo wei da kular u wa ka JSM u yakhun ko deiwa khor pyrchah ya ini i kaam wa ktah ya ka jaitbru.
Ya kani ka yalang da pynlai da u N. Ribok Biam, President JSM Western Region wei ya ki kyntien e khublei da yoh na u Jimmy Raul Kharmuti, Working President JSM Central Body wei da yarap pynlai leh ya ka da u Terrence Sawian kam u Chief Advisor ka JSM.
Kiwa kitkaam wa thymme ka CEC neibynta ka samoi 2022-2025 man ki kamni ha wah:
1. U Leningstar Rymbai, President
2. U Jimmy Raul Kharmuti, Working President
3. U Skhembhalang Dkhar, Incharge Central Body wa u Edidahun Lamare Regional In-charge kiwa man leh kam ki Vice President.
4. U Roitre Dkhar, General Secretary
5. U Kerbhamiki Dkhar, Assistant Secretary
6. U Pillarstone Phawa, Chief Organising Secretary
7. U Jordan Rymbai, Organising Secretary
8. U Welson Siangshai, Education Secretary
9. U Heyboyme Myrphet, Assistant Education Secretary
10. U Marbud Chyrmang, Financial Secretary
11. U `Nicholas Rymbai, Assistant Financial Secretary
12. U Cleofast Shylla, Discipline Secretary
13. U Chabas Nongtdu, Assistant Discipline Secretary
14. U Shnalad Rymbai, Sport Secretary
15. U Shining Shylla, Assistant Sport Secretary
16. U N. Ribok Biam, Publicly Secretary
17. U Shri. Donkupar Kharkrang, Assistant Publicly Secretary
18. U Pynbait S Passah, Socio & Cultural Secretary
19. U Eilad Dkhar, Assistant Socio & Cultural Secretary
20. U Chanskhem Suchiang, Information Secretary
21. U Bormi Dkhar, Assistant Information Secretary
22. U Binet Suting wa u Ioanis Rymbai, Office Secretary
