Ka Rotary Club Jowai ha uni u snem da kynjoh i lai luti yong ka cha u moomær wa 27 tylli ki snem kamtæ kamwa jooh man khlieh u snem ha ka sngi Khyllaw 2 tarik Nai Ynniaw leh kam chibynta wow tyngkheiñ næ pynkut ya ka samoi krehkaam yong u 2021-22 da pynman ko ka yachemlang wa kyrpang ha Yung Yonglang ka Loomsooiung New Hill, Jowai wow pynskem leh ya kiwa kitkaam ka seiñ neibynta ka samoi yong u snem 2022-23.
Ya kani ka yachemlang wa kyrpang yong ka seiñ wa tip kam ka 27th Installation Ceremony da wan sakhilang leh da u Rtn. Vincent H. Pala uwa man leh u MP yong ka Shillong Parliamentary Seat heiwa ya ka bynta wa nyngkong yong ka yalang da pynlai da u Rtn. Montri Passah, President Rotary Club Jowai 2021-22 katwa ya ka bynta wa ar won da pynlai da u Rtn. Samehi Laloo, President Rotary Club Jowai 2022-23.
Ka Rtn. E.F. Gatphoh, Charter President hawa klam ha kani ka janmiet da kdar yahkhmat ko u batai chaphang ka yumut yong ka kyntien Installation hapoh ka Rotary Club wei da yaroh ko leh yei krehkaam u Rtn. Montri Passah deilang wa ka dhab yong oo neitæ kitbok kitrwiang ko leh ya u Rtn. Samehi Laloo, President Rotary Club Jowai 2022-23 kamjooh ya ka dhab yong oo waroh kawi heiwa da ong ko leh yooluti neini chakhmat iwa rap miat rap bha chooh chooh u yoh i ki u yoo u sakhi khamtam ki kaam wa yatoh wei myntoi yong ka imlang sahlang ki khon ka ri Jaiñtia.
Ya kiwa kitkaam ka Rotary Club Jowai yong ka samoi 2022-23 da pynskem ha kani ka janmiet da u Rtn. V.H. Pala kiwa kynthup yow Rtn. Samehi Laloo, President, Rtn. Montri Passah, IPP, Rtn. Deibormi Toi, President Elect, Rtn. Mewothi Gatphoh, Vice-President, Rtn. Dr. Kamwadae Syngkon, General Secretary, Rtn. Lakhon Laloo, Treasurer, Rtn. Fencing Syrti, Sergeant at Arm, Rtn. E.F. Gatphoh, Foundation & Club Trainer, Rtn. D.F. Majaw, Director Club Service, Rtn. S.K. Lato, Community Service & Bulletin Editor, Rtn. Reuveny Nongtdu, Vocational Service, Rtn. B. Lytan, Club International Director, Rtn. B. Paka Najiar, Youth Service Director wa u Rtn. Longda Bamon, Literacy Chair.
U Rtn. V.H. Pala hawa klam kam u kongsan heijooh i por leh uwi na ki dkhot ka seiñ wa da embynta da ki boon tylli ki snem da ong u wa i em hapoh ka Rotary Club man ko ka laad ka kabu wow wanrah yeitæ i sñiaw wa yajan yong i ki bru na kawi ka ri ha kawi ka ri, chooh chooh da kitbok kitrwiang wei e mynsien u leh ya u Rtn. Samehi Laloo deilang ya ka dhab yong oo wow man kiwa em i ya sñiawthooh yumut wei yakrehlang hawa leh yeiwon yeiwon i kaam, katæ toh ka luti kawa ye u wanrah yei yatylli wei u kyntu kynrong yei rukom krehkaam ka Rotary Club Jowai neibynta i myntoi yong ka imlang sahlang ki khon ka Ri Jaiñtia.
Kiwi ki dkhot ka seiñ kiwa da embynta ha kani ka janmiet toh u Rtn. D.F. Majaw uwa da pynlai ka bynta yong i pynkup burom yow kongsan, u Rtn. R. Nongtdu uwa da e ki kyntien pdiang burom, u Rtn. S.K. Lato wa da khana yei parom wa tbian u Rtn. Vincent H. Pala, u Rtn. Dr. Kamwadae Syngkon wa u Rtn. Dr. D.I. Kjam kiwa da booh ki kyntien khublei.
