Jowai: Kam chibynta wow wanrah yaka yajan, i ya tipmit wa i yatylli kam ka kur Dkhar waroh kawi ka ri-loom Jaiñtia, ka Seiñkur Dkhar Jaiñtia Hills Seiñbei wa ka Seiñkur Dkhar West Jaiñtia Hills District da pynskem ki ya ka Seiñkur Dkhar West Jaiñtia Hills Mowkaiaw-Mowjem Unit ynnin 21 tarik haka yalang wa pynman ha yung ka Margret Dkhar ha ka chnong Mowkaiaw.
Ya kani ka yalang pynskem ya kiwa kitkaam da pynlai da u Harwis Dkhar, President Seiñkur Dkhar West Jaiñtia Hills District uwa man leh u Vice President Seiñkur Dkhar Jaintia Hills Seiñbei. Chwa wow sdang ka yalang da yoh ya ki rwai pdiang burom na ki manbei, ki khon khynroo yong ka Kur Dkhar Mowkaiaw-Mowjem Unit wei da pynchongchit ya kani ka sngi da ki chaad, ki yalehke Drama, ki Chaad Pliang wa kiwi kiwi.
U Hamjhan Dkhar General Secretary Seiñkur Dkhar Jaiñtia Hills Seiñbei da yahkhmat u wow puræ ya ki ktien smai wei yaka Seiñkur Dkhar West Jaiñtia Hills Mowkaiaw-Mowjem Unit da jied ya kini ha wah kam kiwa ksohkaam:
Chairman- Hamly Dkhar, Vice Chairman-Kroilybon Dkhar, Secretary-Barson Dkhar, Asst. Secretary u Syrpailin Dkhar, ki 10 ngit ki dkhot wa kynthup ki Adviser u Frankicene Dkhar wa u Habahun Dkhar.
Kiwa da emlang ha kani ka yalang toh u Gabriel Dkhar General Secretary Seiñkur Dkhar Jowai Unit, u Kermi Dkhar Chairman Seiñkur Dkhar Pasyih Unit, u Mothing Dkhar Executive Member Seiñkur Dkhar West Jaiñtia Hills District wa u Eleazer C Dkhar Executive Member Seiñkur Dkhar Jaiñtia Hills Seiñbei wa West Jaiñtia Hills District.
Discussion about this post