Ka War Jaiñtia Students Union (WJSU), Central Body haka 22 tarik uni u bnai, da hiar ko cha chnong Satpator hei yahkhmat u Vice President, u S. Syngkor wa u General Secretary, u Everest R Langstang neibynta u pynskem ya ki dkhot ka WJSU Satpator Sub Circle ha chnong Satpator, kawa kynthup ya 5 tylli ki chnong kitæ toh ka Amtra, Amsohrhong, Amlanai, Satpator waka Trangblang.
Kiwa ksoh kaam ka Satpator Sub Circle kynthup ki ya u President, u Yomiki Syrti, u Vice President, u Waimon Swer, u General Secretary, u Heart Cassing Dkhar, u Joint Secretary, u Pormi Patwat, u Finance Secretary, u Strongpilar Dkhar, u Joint Finance Secretary, u Waiphang Pasyad, u Education Secretary, u Syemner Amse, u Joint Education Secretary, u Phulison Amse, u Organising Secretary, u Princely Langshiang, u Publicity Secretary, u Saman Shylla, u Sports Secretary, u Recomfort Pasyad wa u Environment Secretary, u Bannangsan Dkhar.
Ki dkhot won kynthup u Shirup Amse, u Formost Manner, u Rishot Dkhar, u Ame Khaii, u Never Shylla, u January Shylla wa u Elvin Tongper.
Ya kini kiwa ksoh kaam ka Satpator Sub Circle da pynskem da u General Secretary ka seiñ WJSU Central Body, u Everest Langstang, uwa da chim leh ka bynta wow pynche ya ka yurim ka seiñ deiwa ong wa em ko i thrang wow chakri ya ka thaaiñ ha waroh ki liang wei wow thooh ki laad ki luti yow pynku yei puræ puthi.
Neitæ kamwa ka sorkar dang lai ko chakhmat wow kreh noh ya ka Leshka Hydel Power Project ha kani ka thaaiñ, ong u wa dei yakrehlang ka Satpator Sub Circle chirup ka WJSU Central Body neini chakhmat u pynbor ki ya ka sorkar wow smat pynkreh noh ya kani ka Hydro Project khnang yow yoh khih yoh khan ki bru ka thaaiñ wei wow pahooh bordiñ ha ki snem wow wan.
U General Secretary ong haroh u wa neibynta i myntoi ka thaiñ, ka seiñ da e dorkhat ko leh yow wai noh yaka Ttransit Point ka Dawki Land Customs Station ha Muktapur yow yoh chalan moochuni na Syndai Trangblang Limestone Belt cha Bangladesh yow heh i kamai kajih ki paaid ka thaaiñ.
U Vice President ka WJSU Central Body, u S. Syngkor hawa klam da kyntu kynpham u ya kini ki khynroo wa dang psiah cha ka WJSU wow man kiwa em burom em akor wei wow chakri hok ya ka seiñ neibynta i myntoi uwa boon wa lang ha kani ka dong ka thaaiñ.
Kamtæ neiliang u President ka Satpator Sub Circle, u Yomiki Syrti wa u General Secretary, u Heart Casing Dkhar hawa pdiang wei mynjur yei kyntien kyntu kynpham u kiwa yahkhmat ka Central Body, da ong ki wa lada khlem ka kynhun næ khlem i yakrehlang kam ki khynroo ka thaaiñ ym ye ki wow chakri næ pynphet pynphar yei kaam hapoh ka dong ka thaaiñ.
Discussion about this post