Pynsniaw ka AMMTT cha u Conrad yei chalan tooh ya u mooyong wa u moochuni cha ki karkhana ha EJH

Jowai: Ka Association of Meghalaya Traders and Transporters (AMTT) ynnin ka sngi da thoh ko cha u montri rangbah ka jylla, u Conrad K Sangma wow ujor pyrchah yei pynlai ya u mooyong wa u moochuni cha ki thaaiñ wa em karkhana hapoh ka East Jaiñtia Hills.

Ka seiñ da ong ko wa kjutnood ko u pait hi-eh wei wow pyntip wa em ki karkhana khyndaw-bilat ha EJH chaniah ko du ha ki mar pohkhyndaw wa tih na kylleiñ ka District.

Da ong ko wa i wym em ki Revenue Checkpoints namo ki Check Gates ha ki sarok wa lai cha kini ki karkhana wow sylli ya ki mar wa kit ki truck da myntoi bha kini ki karkhana neibhah u moochuni wa u mooyong ym em wa khrong dan na ki.

Chooh ka AMTT da ong ko hanlada yoh myntoi ki karkhana chiboon na ka sorkar, i dor yong i khyndaw-bilat leh ym em hiar i wei i dor wa dai cha Assam dang toh i bar i dor wa dai ha Khliehriat wei i wym khrong dan ya ki da ktah joor i yei yoh poisa ka jylla iwa da ktah won ya ka sorkar wow pynbiang ya ki thaw sumaar, ka puræ puthi wa kiwi kiwi.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da ong ko wa ñiaar wow wan ki heh karkhana namo ki Industrialists cha East Jaiñtia Hills, wei kwah ki du ya ka spah yong ka rymaw donhi wei khlem ini ymtip hi ki heiwon em ka sor Shillong.

Heijooh i por da kyntu ya ka sorkar wow dam u yachah ware ya ki karkhana neibhah da toh u khrong dan ya ki mar wa lai chapoh ki karkhana.

Da pynkynmoo ka seiñ leh wa ka sorkar da e yarap ko chiboon ya kini ki karkhana kam ki subsidy, ka seiñ da ong ko “Da toh i por wow pyrkhat ya ki paidbah wei wow pynroi chwa ya ka jylla bar ya ki tre karkhana i wow yarap pynku yei rukom im ki bru hapoh jylla.”

Da antaad ko wa kamwa 800 tylli ki truck wa kit ya u moochuni wa 130 truck kit mooyong wa psiah cha kini ki karkhana wei kini ki truck toh kiwa kit palat pood, hadooh le chah na iwa chah.

“Lada kheiñ 25 MT u mooyong chi sngi daw kynjoh i 1,186,250 MT u mooyong chi snem da pyndoohnong ya ka sorkar pyrdi wa ka sorkar jylla lyngba ka dan wa ka Royalty wa ye u khrong na u mooyong wa psiah chapoh karkhana wa em ha East Jaiñtia Hills,” da ong ka seiñ ha ka dorkhat.

Chooh chooh da antaad wa 30 MT u moochuni chi sngi ha ka chi snem da kynjoh i 8,760,000 MT.

Ka seiñ da ong ko leh wa deiwa yoh u khrong dan ka sorkar daw ye ko wow leh chiboon ki kaam pynroi hadooh i pynhiar dor ya i phniang, wa kiwi kiwi.

Chooh chooh da ong ko wa emkaam wow em ka Policy wa kdoh ya ki karkhana hawa yoh myntoi subsidy ki toh u elaad ki leh ya ki tre jylla wow man kam ki transporter bar ya kiwa na Punjab, Jammu & Kashmir wa kiwi ki jylla.