Haka yalang wa da pynman daka PRIME Hub Shillong kawa man ka laad yarap seiñ khih ka sorkar jylla kawa da pynman ynne ha Conference Hall ka yung krehkaam u Deputy Commissioner, West Jaiñtia Hills District. Kiwa seiñ khih dei yong ki da kiwa rap phær da wan pynsñiaw ki yei eh wa da maad ki.
Hawa yaklam wa u Barnari Mawlong, MCS Joint Secretary, Commerce & Industries, Add. CEO Meghalaya, Director MBMA, Director MIE, da ong u wa lyngba ka PRIME da kwah wow pynchlur ya kiwa seiñ khih dei yong ki hi, neibhah wa em i thmu wow booh yaka PRIME Hub ha Jowai.
“Chwa wow pynlut poisa neibynta ka PRIME Hub kwah i wow sñiawthooh chwa kiwa kammon kiwa da seiñ khih kiwa em ha kani ka thaaiñ wei iyi i kaam wa sñiaw kwah ki najrong i eh wa chem ki, khnang wow tip yei emkaam lada toh wow e kyrchaan neiliang ka sorkar”.
Ha kani ka sngi da pyntip u wa da wan chimbynta nadooh kiwa chna phlim, kiwa rwai, ki kynhun wa yatoh waka rep ka riang hawa yatoh wow pynlai yaw ya ki mar, wow yoh yei dor wa biang wei wow neh slem ki mar.
Da ong u leh wa kiwa pynmih ya ki mar da kwah ki wow yoh ya ka yusong baam wa biang, ka yaw ka haat najrong kiwi de i eh wada pynsñiaw da kiwa seiñ yong idæ hi.
“Lyngba i e yumut wa da yoh pynlang ha kani ka sngi, neiliang ka PRIME Hub daw chong phyllu yumut, wei i sñiawthooh i wa kiwa seiñ kaam yong idæ- para ki leh ye ki wow yarap uwi ya uwi, neibhah lyngba iwa da chem ki, ye wow sñiawthooh heiwon u ye u pynbait yei eh,” ong u Barnari Mawlong.
Ha kani ka sngi neiliang ki sahep sorkar waphær ka District da emlang leh u Dr. Sanjeev K Ningombam uwa naka Indian Institute of Management.
Puræ leh: Ha ki snem wow wan daw sdang hadooh 50 tylli ki PRIME Hub hapoh ka jylla
