Ka Jingiaseng Samla Balang Presbyterian Daistong da pynman ko ya i pynsñiawthooh namo ka Awareness Program hajrong ka phang “Yada wei pynneh pynsah ya ka rym-aw” ha ka 18 tarik heiwa da pynche hajrong ka phang wow yada u pynneh pynsah ya ki mar thung nadooh ki soh, ki dieñ wa kiwi kiwa em ha talawiar soodong.
Ka R. Sutnga kawa sikai Science ka UP School, Daistong da pynche ko yei myntoi wa yoh na i em ka la’ær (Oxygen) kawa khooid wei ki dieñ ki riñ mynsien won ki ya ka la’ær wa sih wei da yoh wow chna yung da ki dieñ kiwa bha wei yoosuk wei ye leh u chna dawai, na ki dieñ soh won da yoh u baam kiwa tei yei doh i pran wei yarap ki ya ki warep wow kamai poisa na ki soh dieñ khloo, kamtæ ymtoh wow pam khiar ya ki dieñ ki siej neibhah wa e myntoi ki ya kiwa im nadooh ki bru wa ki mrad.
Da pynche ko leh wa lada ymem ki khloo, u slap leh duna u wei i chit leh ku i kamjooh leh pynmih ko sa ya ka la’ær wa sih (Air Pollution) kamtæ ki kjut leh u mih ki har rukom.
U Philimon Sukhlain da pynche u wa ymtoh wow pynemkaam da ki dawai dachin hawa lai beh doh-um neibhah daw tynyap wei pyndoohjait i ya kiwa khian hadooh kiwa khian tam wei ym yoh de ki wow roi wei daw dooh jait ki waroh wei ki bru leh wa daw dooh myntoi ki.
Deiwa pynrap wa lada pyndooh ya ki mrad daw hap lai pait ya ki toh sadu cha Park næ Zoo wa em cha baar jylla kam cha Assam wa kiwi ki jylla wei da kyntu u wa ymtoh wow lai beh næ tynyap ya ki mrad khnang wow roi ki kam ha ki por nachwa.
Ha ka sngi kawa bood ha ka 19 tarik da pynman ya i thung dieñ wei da yoh i phyllu yumut na u Vestperson Sutnga wa da chah hikai ha i kaam thung dieñ wei da pynyoo nongmuna u ya ki.
Ya kani ka pynsñiawthooh da e yarap poisa na ka YESS Meghalaya, heiwa kiwa chimbynta da em ki kamwa palat 200 ngut nadooh ki khynnah wa 14-15 snem tam.
Ya ka yalang da pynlai da u Vice-Chairman Jingiaseng Samla Balang Presbyterian Daistong u Thynnda Monlong Pyrngap.
Discussion about this post