Ka yung krehkaam yong ka District Hub for Empowerment of Women (DHEW), kawa haap hapoh ka chnat Social Welfare, West Jaiñtia Hills District chirup i yakrehlang wa ka District AIDS Control Officer, DISHA, West Jaiñtia Hills ha ka 9 tarik uni u bnai da pynman ko i pynsñiawthooh paidbah heiyatoh wa i chait i khiah yong ki kynthai, ki manbei ha Community Hall ka chnong Raliang, kawa man leh chibynta i lai pynsñiawthooh paidbah wa kyrpang neibynta 10 sngi kawa haap hapoh ka Sankalp Hub for Empowerment of Women-on-Women Centric Themes.
Ha ini i pynsñiawthooh paidbah da klam batai pynche hajrong i kjut duna snaam iwa ktah bha ya ki kynthai ki manbei, neitæ i kjut Cancer, HIV/AIDS wa ktah ya ki kynthai, ki manbei wei da batai ki leh heiyatoh ki Scheme wa kiwi ki laad yarap neibynta ki kynthai wa ki manbei.
Ha katai ka sngi, ka M. Papiah, Adolescence Counsellor yong ka Laskein CHC da e ko i klam hajrong ka phang “Anaemia, highlighting the risk factor, sign and symptom and prevention”.
Ka D. Suchiang, PHN yong ka Laskein CHC da batai pynche ko hajrong ki jait kjut Cancer waphær waphær ya ki kynthai, kamjooh ki dak ki chin wa ki laad sumaar.
Ka N. Rynniaw, Data Monitoring and Documentation Officer da klam batai pynche ko hajrong i kjut HIV/AIDS, najrong i rukom yabi, ki dak ki, chiñ, ki laad yada wa kamjooh ki aiñ ki kyndon ka HIV/AIDS Act.
Ka Y. Kyndait, Gender Specialist District Hub for Empowerment of Women WJH da klam ko hajrong ka POCSO Act, ka S. Meliora Lamare, District Hub for Empowerment of Women, West Jaiñtia Hills District da pynsñiaw ko ya ki Scheme wa haap hapoh ka Mission Shakti kiwa yatoh wa i pynkupbor ya ki kynthai wa ki laad e yada.
Ha kani ka sngi da emlang nadooh ki khynnah skur, kiwa sikai yong ka skur Jehoval Jireh Secondary School Raliang wa ka Kwor Dolloi Secondary School Raliang, neitæ ki manbei, ki Aganwadi, ki Asha wa kiwa kreh na ka Sub Centre wa Laskein CHC.
Ya ka yalang ha kani ka sngi da pynlai da u L. Dkhar, President VDP, Raliang.
Discussion about this post