Ka Ephphatha Society kawa man ka seiñ wa kreh monsñiawbha neibynta ki bru wa kyrpang (Person with Disabilities) ynnin ka sngi da pynman ko ya ka Awareness Program ha ka chnong Wapung Skur, EJH hajrong ka phang ka wa ong “I eh wa maad wa ki laad yarap neibynta kiwa duna hei doh i pran”.
Ha kani ka yalang da wan chimbynta da ki 39 ngut ki bru wa kyrpang kiwa na ka chnong Tuber Sohshrieh, Tuber Kmai Chnong, Wapung Chnong, Wapung Skur, Pamra Kmai, Pamra Paithlu wa Mookhep, kamjooh wa ki khynnah skur ka K.B. Memorial Secondary School, Wapung, kiwa ha-yung ki bru wa kyrpang wa ki dkhot ka Ephphatha Society.
Ya ka phang yong kani ka pynsñiawthooh da phiah ha ki ar bynta, heiwa ka phang wa nyngkong da klam hajrong ka “I eh wa ki bru wa kyrpang maad ki ha-yung ha-sem, ha ki chnong ki thaw wa ha ka imlang sahlang” heiwa da yoh i klam na ka Heini Sumer, Protection Officer (PO) na District Child Protection Officer, Khliehriat.
Ya ka phang wa ar won kawa ong: “Ki laad yarap neibynta ki bru kiwa kyrpang” da batai da ka Ripaia Passah kawa man ka District Social Welfare Officer (DSWO) Khliehriat.
Neiliang kiwa wan cha kani ka yalang da e khublei kyrpang ki ya ka Ephphatha Society kawa da pynman ya kani ka pynsñiawthooh kawa man ka laad u pynkupbor ya ki ha ka imlang sahlang.
Ka Ephphatha Society da e khublei kyrpang ko leh ya ki bru chemphang namo ki Resource Person, ya ka chnat Bhalang (Social Welfare) kawa da pynlut pynsep ya iwa emkaam waroh ha kani ka sngi.
Kamjooh leh da e khublei ya ki Waheh Chnong yong ki 6 tylli ki chnong hajrong i krehlang yong ki, khamtam ya ka chnong Wapung Skur kawa da chah wow pynman ya kani ka yalang ha ka chnong yong ka.
Ya ka yalang da pynlai da u Meker Ksih, heiwa da yoh ya i klam pdiang burom na u Posting Dkhar uwa man u Asst. Waheh Chnong ka Wapung Skur wa i klam e khublei na u Serious Dkhar.
