Ynne ka sngi ka Mahila Arogya Samiti (MAS) Panaliar Unit da pynman ko ya i pynsñiawthooh namo ka Awareness Program hajrong ka phang ‘Health and Nutrition in Children and Adolescents’ namo i chait i khiah wa i emkaam ya ki baam wa tei yei doh i pran ki khynnah wa kiwa dang khai khynroo.
Ya ka yalang da pynlai da ka Biangtre Bamon kawa man ka Chairperson ka MAS, ya ki kyntien pdiang burom da yoh na ka Unita Pakma wa i ngooh Blai na u khynnah Weiman Laloo.
U Waheh Chnong, u Riquoma Rq. Laloo da batai u ya i krehkaam ka MAS weiwa da e u i kyrkhu kyrdoh ya ka MAS Panaliar Unit.
Ki bru chemphang ha kani ka sngi toh ka Sahida Kyndiah, Nutritional Consultant na Dulong wa ka Jane Rymbai, Adolescence Consultant na Jowai Civil Hospital.
Ka Sahida Kyndiah da batai ko ya ki khynnah heiyatoh wei emkaam i baam wow tei ya i doh i pran wow chait u khlan wei wow yait nei baam kyndeh (Junk Food), da kyntu ko ya ki manbei wow e i baam deiwa dam u pynjooh yei e phone ya ki khon heipor wa baam. Neiliang ki khynnah leh da yaklam bha ki waka heiwa da jubab ko yeiwa kylli ki.
Ka Jane Rymbai da e ko i batai chaphang i chait i khiah kiwa khai khynroo wei da ban joor bha ko heiyatoh wa i ktah yong i punkhon dang khian rta namo Teenage Pregnancy, da kyntu ko ya ki wow wan cha ka ha Civil Hospital næ ha Urban Health Centre lada em iwon iwon i eh iwa chem ki.
Ya ki kyntien khublei da yoh na ka Tiptre Bamon kawa man ka Secretary ka MAS kamjooh leh kam ka Asha ha Panaliar.
Hadien wa kut ka yalang da saam ya u chana kule cha kamwa 230 ngut ki khynnah.
