Ka 28 tarik Naisan toh ka sngi watip kam ka World Menstrual Hygiene Day heiwa ka thong yong kani ka sngi toh wow mih ki kynthai chakhmat yow yaklam yaphyllu yumut chaphang i chait i khiah ki kynthai khyllood kamjooh ki manbei.
Ka R.C. Eve Secondary School Mihmyntdu yong ka Thadlaskein Block kam i dak i ya ksoohktilang wa ka pyrthai chityllup hei kynmoo ya ka World Menstrual Hygiene Day 2022 ha ka sngi Hat 30 tarik Naisan da pynman ko ya ka yalang e sikai wa kyrpang ya ki khynnah wa purae ha kani ka skur.
Ka Tina Lakiang, Secretary School Managing Committee ka R.C. Eve Secondary School, Mihmyntdu hawa klam yahkhmat da ong ko kynmoo ham sñiawphær sñiawphylla wow yaklam ya kani ka sngi kam kitæ ki bru kiwa u Blai Trekirot da booh da chna kyrpang u wei ong chooh chooh ko leh man iwa emkaam bha wow ya chimbynta kam ki khynnah skur khnang yow lait phi nei sahdoom sahbiej wei wow tip phi leh ya ki rukom watoh u leh hei kylla yong ki por ki rta hei man rynyieñ rynyiot yong phi.
Ka F. Pohshna, Asst. Teacher, R.C. Eve Secondary School hawa e kyntien kam ka bru stat, bru chemphang yong kani ka yalang da ong ko kynmoo i khooid i jngiar toh iwa emkaam hei im wa man-ka-sngi wei kyrpang leh khamtam ha ki por kiwa wan i kylla hei man rynyieñ rynyiot yong i ki kynthai.
Chooh chooh neibynta wow che u sñiawthooh bha ki khynnah wei wow tip ki leh u bood ya ki rukom watoh u leh hawa wan i kylla hei doh i pran yong ki, da pyrchang ko leh u wanrah u pynioo ya ki dur kiwa da pynkhreh kyrpang ko neibynta kani ka yalang.
