Ka Seiñ Kynthai Welfare Society Mihmyntdu kawi na ki seiñ yong ki manbei wa kreh neibynta i miat i bha ka imlang sahlang yong kiwa chong chnong, ha ka sngi Muchai 27 tarik wa ka Pyngkat 28 tarik u Wisu dei yarap poisa ka yung krehkaam yong ka District Social Welfare Officer, West Jaiñtia Hills da pynman ko ya Workshop namo ka e sikai kyrpang ha R.C. Eve Secondary School Mihmyntdu.
Ha kani ka e sikai da wan chimbynta da ki khynnah puræ yong ka R.C. Eve School Mihmyntdu wa na Don Bosco Secondary School, Mookymphad Mihmyntdu wei ki mat ki phang kiwa da yoh myntoi ki khynnah lyngba i klam i batai ki bru stat bru chemphang ha ki ar sngi yong kani ka Workshop toh hajrong ka aiñ Child Marriage Prohibition Act 2006 wa da batai da ka J. Synnah, District Social Welfare Officer, West Jaiñtia Hills neitæ hajrong i ktah i chongkha dang khian rta ya ki chynrang wa ki kynthai wa da klam khana da ka Test Mary Suna, Matron Civil Hospital Khliehriat, neitæ hajrong ka aiñ Juvenile Justice Amendment Act 2021 wa da pynsñiaw da ka Ialam Sutnga, Outreach Worker DCPO, West Jaintia Hills katwa ya ka phang i ktah i dam skur chiteiñ por da klam da u S.D. Laloo, Community Mobilizer, SSA West Jaiñtia Hills.
Ha ka sngi pynkut ya kani ka Workshop da wan embyntalang leh da ka M. Lakiang, District Mission Coordinator, SSA West Jaiñtia Hills kam ka kongsan ha ka yalang wa pynlai da ka Baiahunlang Phawa, President SKWS, Mihmyntdu wei da yoh leh i klam tbian na ka Jessica Biam, Asst. Secretary SKWS-Mihmyntdu neitæ ki kyntien sneiñ kyntien kroo ya ki khynnah na ka Sister Sheela Thomas, Headmistress Don Bosco Secondary School, Mookymphad wa ki kyntien sñiawngooh na ka Sister Puspita Beck, Headmistress RCLPS School, Mihmyntdu.
Ka M. Lakiang hawa klam kam ka kongsan da yaroh ko ya ka Seiñ Kynthai Welfare Society Mihmyntdu kawa dei mynsien sñiawkhia yei miat i bha ki khynnah wa ka imlang sahlang waroh kawi thooh laad ko wow leh ki kaam waphær na ki por cha ki por khamtam heiliang wow pait yei miat i bha ki khynnah wa wan na ki manyung wa ban i dooh i chah wym yoh laad u lai skur. Chooh chooh e mynsien ko leh ya ki khynnah wow man kiwa kitkhia yei kaamram wei wow ri syndong yei burom wei akor.
