Kam chibynta i kynmoo burom yei hok kiwa thied wa pet wa tip kam ka World Consumer Rights Day, ynne ka sngi ki muktiar ka District Legal Services Authority, West Jaiñtia Hills District da pynman ki yei pynsñiawthooh paidbah heiyatoh wa i hok kiwa wan thied kamjooh leh ka aiñ wa e yada ya ki wa da pynman ha pchem ka Jowai Police Station kawa em ha Iawmusiang, Jowai.
Ha kani ka pynsñiawthooh paidbah wa pynlai da u D. Rymbai, Front Office Coordinator ka DLSA Jowai, da emlang leh kiwa mihkhmat napoh ka chnat Supply wa napoh ka District Legal Services Authority ka West Jaiñtia Hills District.
Ka C. Syiem, Inspector of Supply, West Jaiñtia Hills District hawa klam hajrong ka phang “Fair and Reasonable AI for Consumer” kyntu ko ya kiwa thied wow man kiwa pait bniah hawa thied yaki mar ki mata, wa la yahaap hi mo ka poisa wa su wa i dor ki mar kamwa thoh haki yusong, wei u thied leh ki mar ki mata wa em i chap ka ISI, Agmark wa kiwi kiwi.
Da kyntu ko wym toh leh u myllin paan Cash Memo kamjooh ki Guarantee/Warranty Card wa dadep soi da kiwa dai dukan khnang yow suk hawa lai ujor. U pait bha yaki tarik wa chna (Manufacturing Date) waka tarik wa kut (Expiry Date) wa thoh haki yusong yong ki mar ki mata.
Lada chem won wym biang i thaw khia wei wym yahaap katkam i dor wa su, ye u lai ujor cha ki District Commission waka State Commission.
Neitæ da pynche ko leh yaka hok wa yada ya kiwa thied wa pet hapoh ka aiñ Consumer Protection Act 2019, khnang yow lait nei mynsoo næ chah ktah i chait i khiah hawa baam yaki mar wa thied næ ki tiar ki tar wa thied ki.
Ka hok wow yoh yei tip wa tikna (Right to be Informed) namo wa ye u kylli u tip bniah heiyatoh i man i long ki mar.
Ka hok wow jied (Right to Choose) katkam wa ngait wa kwah, wei ong ko ya kani ka hok ye bha u pynkrehkam haki yaaw ki haat wa boon ki mar waphær waphær iwa yoo kam i jooh i dur tangwa i dor won yaphær.
Ka hok wow pynsñiaw wow ujor (Right to be Heard/Complain) heiwa kiwa thied ye ki wow lai pynsñiaw næ li ood li naam yeiwa chem ki cha ki bor wa ha khlieh.
Neiliang u J. C. Tariang, Legal Counsel hawa klam hajrong ka phang “Consumer Protection Act 2019” da batai u yei yumut ki aiñ ki kyndon wa e yada kyrpang neibynta kiwa thied wa pet.
Khana u leh yaka hok kiwa thied kamjooh leh ka luti wa toh u lai ki hawa tyngkhooh yei eh, deiwa pynsñiawthooh leh heiyatoh waka Consumer Dispute Redressal Agency kawa em ha man ki District.
Neitæ da khana haroh u yaki kyndon wa ye u pynchitom ya kiwa leh pyrchah.
Discussion about this post