Ka Vidya Bharati kawa man kawi naki NGO wa pynku ya i puræ puthi hapoh India da yarap ko u pynsñiawthooh paidbah hajrong ka National Education Policy (NEP) 2020 kawa dang dep mynjur ka sorkar India.
Ha ini i pynsñiawthooh paidbah yaka NEP, ka Vidya Bharati da pynman ko yaki phyllu yumut Online/Offline hajrong i myntoi wa boonjait yong ka NEP.
Ynnin ka 29 tarik ki MyNEP Ambassador (My New Education Policy Ambassador) hapoh i yahkhmat u Tiplem Sumer da lai yachem ki yaki Principal yong ki skur wa College wa rap paaw hapoh ka chnong Jowai kam wow pynlait paidbah yaki “Poster” wa kdaw yaki yakob pyllah wa boonjait wow pynsñiawthooh pynche yaka NEP kawa da e pyrtuid MyNEP lane ka MyNEP Competition kawa em yaki phang ka NEP.
Kani ka yakob man ko da ka “Online ” deiwa lai haka website www.Mynep.in wei da kyntu yaki skur waki College wow pynchlur ki yaki khynnah wa puræ haki yow ya chimbynta lang ki.
Kani ka yakob em ko soo tylli ki phang wa kongsan neibynta ki Class IX hadooh Class XII, ya kiwa lai puræ College wa University kamjooh leh yaki paidbah:
- Bharat Centric Education (iwa rap kongsan yaka ri India)
- Holistic Education (wow tip wow stat ha waroh ki liang ym du hei puræ puthi)
- Knowledge Base Society (u rap kheiñkor yaka imlang sahlang)
- Quality Education (i puræ puthi wa bha wa paka).
Ki yakob pyllah em ki chiboon jait kam i dro da ki kti, dro wow pyn wyrngia (Meme), i thoh chithi cha u Prime Minister, i thoh Essay, Speech Making, Digital Design, Twitter Thread, Quiz Competition.
Yaki wa jop daw e yaki khusnam daka poisa waki Certificate kamjooh leh daw e Certificate cha waroh kiwa ya chimbynta haki yakob.
