Shillong: Ka West Khasi Hills da jop ko yaka yalehke Final ki chynrang wa kynthai haka Basketball ynne ka sngi wa soo ka Meghalaya Games 2019-20, heiwa haka yakob Swimming wa Tennis leh da pyndep ynne ka sngi.
Ka Alyzza M Lyngdoh da jop ko haki yakob yimpa ki kynthai katwa u Pankaj Chettri da jop u yaka takma ksiar haka Men’s Tennis Singles.
Haka Basketball, ki kynthai ka WKH da wan ki nadien yow jop da 47-40 yaka East Khasi Hills ha JN Sports Complex. Da pynbood won sa ki chynrang yong ki yow jop yaka West Jaiñtia Hills da 57-52. Ka Yarisha Wahlang wa u Ethelbert Shyrkon ka West Khasi Hills da yoh ki ya i naam Most Valuable Player ha ka yalehke kynthai wa chynrang.
Ka yakob yimpa kawa pynman ar sngi ha Crinoline Swimming Pool kawa pynkut ynne ka sngi. Ka Alyzza Lyngdoh da yoh ko soo tylli ki takma ksiar haka Backstroke, Butterfly, Freestyle waka Breaststroke. Ha yong ki chynrang won, da jop u Sanjay Jamatia (Backstroke), u Manu Debbarma (Butterfly), ka Assam Regimental Centre (Freestyle & Medley Relays), u Likak Jamatia (Freestyle) wa u M Sagar Sharma (Breaststroke).
Haka Tennis won wa pynman ha Shillong Club, u Chettri da jop u yaka Singles Final da 6-1, 7-5 pyrchah ya u Nitesh Rai, uwa yalehke wa jooh Coach u Chettri. Haka Doubles Final u Chettri wa u Gideon D Shira da jop ki ya u Stardiness Kharsyntiew wa u Pankaj Kapoor. U Kharsyntiew won da yoh u yaka takma tama haka Singles katwa u Rai wa u Vishal Amarnani da yoh ki yaka takma tama haka Doubles.
Ka Meghalaya Athletics Association da pynbna ko leh ya kiwa jop ya i naam Best Athlete Awards heiwa ya ki chynrang haka U-17 da yoh u Donbok Shabong uwa da yoh ar tylli ki takma ksiar haka yaphet pyllah 100m waka 400m.
Yei naam Best Athlete ya ki kynthai haka U-17 da yoh ka Angelina J Jackson kawa yoh takma ksiar haka 100m wa 200m, katwa haka kyrdan Above-17 ya ki chynrang da yoh u Michael Ramsiej uwa yoh takma ksiar haka 5000m wa 10000m wei ya ki kynthai da yoh ka Glorify Kurbah kawa yoh takma ksiar haka 400m wa 800m.
Ka Judo waka Karate kawa sdang ynne ka sngi ha Nongthymmai wa Laban daw pynkut mynstep deilang waka Badminton kawa pynman ha U Tirot Sing Syiem Indoor Stadium kamjooh yaka Billiards & Snooker wa pynman ha Shillong Club.
I yoh Medal deiwa kheiñ katkam ki District man ki kamni ha wah:
Ka Alyzza Lyngdoh
Discussion about this post