Khliehriat: ka seiñ yong kiwa kamai Local Taxi yong ka East Jaiñtia Hills District kawa tip pyrtuid kam ka East Jaiñtia Taxi Owner Driver Association (EJTODA), ynnin ka sngi da pynman ko ya i yalang yong ka kawa tip kam ka General Meeting haka chnong Dkhiah, kani ka yalang yong kani ka seiñ man ko kam chibynta wow pynim ya kani ka Association yow pynkylla dur leh ya kani ka District kam kiwi ki District yaki kari kamai khamtam yaki Local Taxi.
Ha ki por wa da dep ha kani ka District da kamai du da ki kari samen (Private) donhi wei i thmu hi yong kani ka seiñ toh yow pyndooh pyndam yaki kari samen kiwa kamai hapoh kani ka District, ya kani ka Association da pynthmme nea (Register) haka 13 tarik u Naikhynde u snem 2019.
Hachwa wow pynman ya ini i yalang wada pynlai da u Ekirot Bang uwa man leh u Assistant Secretary yong ka seiñ EJTODA, kam ka dak wow pynneh pynsah nea pynthymme ya kani ka Association da yoh wow pynhær leh yaka lama yong ka seiñ da u D. Lamin uwa man u District Transport Officer (DTO) ka EJHD uwa da wan kam u kongsan hei emlang leh u H. Passah uwa man leh u President yong ka West Jaiñtia Taxi Owner Driver Association, u Wandonbok Jyrwa uwa man leh u General Secretary yong ka East Khasi Hills Local Taxi Welfare Association, u President ka Jowai Lad Rymbai-Khliehriat Tourist Taxi Association u A. Ryngkhlem, wa u President ka East Jaiñtia National Council Sumer Circle u Sakilan Chyrmang, da emlang leh u President u Tiplang Rymbai wa u Hamee Selahi Secretary ka EJTODA wa kiwa yah kari wa em hapoh ka lama yong ka seiñ ki Local Taxi.
U D. Lamin uwa man kam u kongsan ha kani ka sngi hawa klam da pynsñiaw u yei sñiawngooh ya kani ka seiñ wada lai luti ha kini ki por ryngkat waka yung krehkaam yong oo heiyatoh wow sylli yaki kari samen wa kamai pyrchah yaka aiñ hapoh kani ka District wei da pyntip u leh wa da daiñ kuna wa da poi T. 2.50 lak kamtæ da e khublei kyrpang u leh ya kani ka seiñ wa da smat ko wow chimkhia ya ini i kaam neibynta i bha i miat khamtam wow wanrah leh yei kylla hapoh kani ka District yong i kam kiwi ki District heiyatoh wa ki kari kamai ne ki Local Taxi, da ong u lada ym chimkhia kani ka seiñ ka Office yong oo ym ye ko wow kdoh u khoom ya kini ki kari samen wa kamai neidaw wa duna wakreh yong oo wei da pyrchang u leh wow yaklam waka sorkar jylla wow pynboon chooh chooh yaki wakreh yow ye u pyndooh pyndam yaki kari samen wa kamai.
Da kyntu u leh ya kitu ki kari yong ki bru samen wa kwah wow kamai wow wan yaleh ki yaka Permit kawa da e mynkna yow kamai kam ki Local Taxi.
Kiwi de kiwa klam ha kani ka sngi kynthup ya u H. Passah, u Wandonbok Jyrwa, u Paila Kordor wa kiwi kiwi.
