Ka Khasi Student’s Union Barato Unit, ha kani ka 13 tarik hapoh i yahkhmat u President ka Unit, u H.E. Sten wa u S.R. Shadap, General Secretary deiwa ya emlang ki dkhot, da yoh ki wow pynthymme biang ya ki Signboard maham wa ki thoh dak tymbud ka wah Mynriang kawa haap haka thaaiñ Barato nadooh i thaw wa tip kam ka “Shem Um” hadooh “Thwai Shyrngan” kam i maham ya kiwa pynyap dusmon ya ki dakha dohum ha kani ka wah heiwa ki bru da jooh pynemkaam ki da ki Dynamite, ki jar, dei ber bih wa kiwi ki rukom kiwa ka seiñ ym ye ko wow pdiang wei pyrchaah ko.
Kam chibynta leh i thmu wa ya ka Thwai Thlunar Tyrsoo u khang pynman kam ka Fish Sanctuary, daw theh dakha leh ha ini i thaw khnang wa lyngba ini, ki dakha daw yoh ki wow roi ha chilynter kani ka wah.
Ka seiñ da khana ko leh wa em kiwa yaleh pyrchah yeini i thmu ka seiñ deiwa leh tooh yow leh dusmon ya ka wah Mynriang wei hajrong ini ka seiñ da man ko kawa da pynkhreh.
Ka seiñ da kyrpaad ko leh ya ki chnong wa em markhap wa ki leh toh u pait wei wow ya krehlang yow poi cha ka thong i jop.
“Ya kiwa chem wa leh pyrchah, ym maap ya ki,” ong u H.E. Sten, President.
