Pynthymme ka seiñ ki Muster Roll ya kiwa kitkaam deiwa rai wow booddien ya ki kaam wa dang sahteiñ

Ka seiñ All Jaiñtia Muster Roll Workers & Labour Union, Central Executive Committee da pynthymme ko ya kiwa kitkaam ki yong ka neibynta u samoi krehkaam 2021- 2023 ha ka 6th Annual General Meeting kawa da pynman ha ka 10 tarik uni u bnai heiwa da jied ya kiwa kitkaam wa thymme ka seiñ kiwa man kamni ha wah:

1. U Khroo Lamsalanki Pariat- Adviser
2. Ka Dayoowanphi Iakai- President
3. U Kitboklang Shadap- Vice President
4. U Army Mulad- Vice President
5. U Dapherborn N Suchiang- General Secretary
6. Ka Hunbeitki Dkhar- Assistant General Secretary
7. Ka Sina Sumer- Assistant General Secretary
8. Ka Manda Bareh- Finance Secretary
9. Ka Banaras Dhar- Assistant Finance Secretary

Kiwa kitkaam ha ki Unit waphær waphær ka seiñ u man ki kam ki Executive Member ka CEC.

Ha kani ka 6th Annual General Meeting ka seiñ da chim ko leh ya ka rai (Resolution) wa man kamni ha wah:

1. Ya Ka Scheme (RCW) Regular Casual Workers 1996, hadien wa ka seiñ da yaklam ko wa u Prestone Tynsong, Deputy Chief Minister I/c warim ka chnat Labour ha ka 21-12-2018 hei emlang u Principal Secretary warim ka Labour Department u D.P. Wahlang, wa ki Deputy Labour Commissioner ka Labour Department yong ka East wa West Jaiñtia Hills da kular ki wow pynkrehkaam ya katai ka Scheme tangwa ka seiñ won chem ko wa ki sahep wa toh u pait ha ki chnat sorkar waphær waphær ym em u pynkhrehkaam ki ya katai ka Scheme. Kamtæ ka seiñ da dawa ko wa u pynkrehkaam noh syndon yeini i dawa wa da slem.
2. U pynkrehkaam noh ka sorkar lyngba ka chnat Labour, yow pynlait wei u pynyoh noh ya waroh kiwa da yaleh ya ki Scheme wa em ha ka Meghalaya Building and Other Construction Welfare Board, kam ki Scheme Education Scholarship, Death Benefits, Pension wa kiwi kiwi.
3. Katkam wa man katni ki Muster Roll chongngiah ki hei rta wa 58 snem. Katwa katkam ka MB&OCWB Labour Department da su Pension ko ya ki Muster Roll hei rta wa 60 snem iwa mut 2 snem hadien wa dep chongngiah na i kaam Muster Roll. Ka seiñ booh ko leh yei kyrpaad na ka sorkar hei wow pynyinsur yei chongngiah ki Muster Roll cha ka 65 snem.
4. Ka seiñ da dawa ko leh u pynkrehkaam noh ki chnat krehkaam ka sorkar waphær waphær ya ka Memorandum wa da pynmih ka chnat Finance Department wow su tulop noh man-u-bnai ha lane chwa ka 10 tarik u bnai wa mih.
5. U pynkrehkaam noh ya ka Memorandum wa da pynmih ka sorkar nadooh u snem 2013, wei wow pynku kyrdan ya ki Muster Roll wa da kreh 5 snem chaneiñ na ka Un-Skilled cha ka Semi-Skilled kamtæ ter ter khlem da pait næ leh chiliangkhmat.
6. Heiyatoh wa ki Mid Day Meal Cook Cum Helper, sa chisien pynkynmoo ka seiñ ya ka sorkar wa toh u pynku noh ya ka Honorarium ka yong ki na ka T. 1000 chi bnai wa yoh ki katni, wei wow su noh 12 bnai hei thaw ka 10 bnai wa yoh ki katni.

Kini waroh man ki ki kaam wa ka sorkar hi pynsahteiñ ko u pynkrehkaam, hawa ya ki Order/Office Memorandum da slem pynmih næ pynlait ko katwa i kaam won kheiñstiñ ki sahep u pynkreh, wei em ki sahep kiwa pynmih hukum (Order) ki pyn dei yong ki iwa khlem em hei thoh næ ki Memorandum.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Kawi won wa ka seiñ chem ko toh wa ki Muster Roll wakreh ha Education Department da su tulop ya ki du 59/89 sngi donhi. Ka seiñ da dawa ko wa toh u pyndam ya kani ka rukom su chi syndon, wei toh u su salonsar kamwa yoh kiwi tawon ki Muster Roll ha ki chnat sorkar.

Ka seiñ da dawa ko leh wa ka sorkar u pynkrehkaam ko ya ka rukom su ‘Equal Pay for Equal Work’, neibhah ka seiñ hi chem ko wa kiwa boon hi kam ki Chowkidar, Cleaner, Peon, Accountant da kreh da ki Muster Roll wei ka rukom kreh man ko i jooh, kamtæ emkaam u pynkrehkaam noh ya ka yow ya ryngkat i kaam wa i rukom su.