Ka seiñ ki Waheh Chnong namo ka Synjuk Waheh Chnong Ri Jaiñtia ynne da pynman ko yaka Annual General Meeting heiwa da jied biang ya u Arminius Lipon, u Waheh Chnong ka Pynthorlangtein kam u President yong ka neibynta ka samoi krehkaam 2024-2027.
Ya kani ka Annual General Meeting da pynman ha Ialong, West Jaiñtia Hills District heiwa da emlang ki Waheh Chnong wa ki Life Member na ki ar tylli ki District ka Ri-loom Jaiñtia.
Ha kani ka yalang da jied leh ya u Kampher Pohlong, Waheh Chnong ka Amlarem kam u General Secretary, u Tellme Phawa, Waheh Chnong ka Sabahmuswang kam u Finance Secretary wa u Damon Dkhar, Waheh Chnong ka Moodop Nartiang kam u Publicity Secretary.
Heijooh i por da jied leh ya ki Life Member wa kynthup ya u Bishar Shylla, u Treasurer, u Shelsing Langi wa u Nidamon Shullet kam ki Internal Adviser yong ka synjuk.
Ya i kaam Vice President da ksoh hi da waroh ki President na waroh ki Block Unit ha waroh artylli ki District kamjooh ki Joint Secretary da waroh ki General Secretary yong ki Block Unit.
Da jied leh ya ki soophaw ngut ki dkhot ka Executive Committee yong ka synjuk na waroh ar tylli ki District.
Ha kani ka sngi da pynsñiaw leh ya ka yukheiñ namo ka Audit Report yong u snem 2021-2023. Da pynsñiaw leh ya ki kaam ka synjuk ha i lai luti ha kini ki le snem kiwa da lai noh.
U Arminius Lipon ha i klam da kyntu u ya ki Waheh Chnong, ki Life Member wa ki dkhot wow kreh chitom, wow man kiwa sñiawkhian wa kiwa yaichah wow man kiwa yatylli khnang wow ye u wanrah ya i kreh hok iwa khooid ha i kaam synchaar chnong wa ha ka imlang sahlang.
Discussion about this post