Ka Sanshnong Umngot Fishing Association, Headquarter Sohmynting, kam chibynta u pynkynmoo ya ki paidbah wow pteiñ ki yei yakrehlang waka seiñ neibynta u yada ya ki dohum wa em haka wah Umngot, ynne ka sngi da pynthymme biang ki ya ka Signboard ka seiñ wa da booh ha u sarok wow hiar cha ka wah Umngot wa em ha chnong Sohmynting.
Lyngba kani ka Signboard da maham ya ki paidbah wa hiar cha ka wah Umngot wym hoi u dat bom ki hapoh ka wah, u pakhot jaar, u sngoh tyrnem, u khyndang lyngka, u dai kiad, noh Plastic, khloh moo wa kiwi ki rukom leh dusmon ya ki dohum dohwah hapoh u pood ka San Chnong nadooh Ryngkang Khla hadooh Tre Waidoom.
Tangwa u chah ya ki paidbah deiwa khwe donhi ha kani ka wah hapoh i por 6 waje i janmiet.
Ki san chnong wa kynthup hapoh kani ka Association toh ka chnong Sohmynting na West Jaiñtia Hills District, ka chnong Mynsang, Mawsir, Mawdulop, Ksanrngei won kiwa na East Khasi Hills District.
Ha kani ka sngi pynthymme Signboard ha chnong Sohmynting da emlang u President ka Sanshnong Umngot Fishing Association, u Simon Pyrtuh, u Secretary, u Welcome Langi, u Treasurer, u Chai Pyrtuh, u T. Ryngkhlem kam u dkhot hei sakhi u Waheh chnong Sohmynting u Bravestar Phawa.
Neiliang u Secretary ka seiñ hawa klam khana u yei lai luti ka seiñ nadooh u snem 2004 wei da yoh ko leh i tipmit naka sorkar ha u snem 2007.
Ong haroh u i daw wa booh ki ya kini ki kyndon, toh wa kwah ki u pyneh pynsah yaki dohum dohwah.
Kamtµ da kyrpad ki ya ki paidbah wym hoi u leh pyrchah yaki kyndon ka Association neibhah lada chem ka seiñ daw pynchitom ko katkam ki kyndon.
Heijooh i por ka Sanshnong Umngot Fishing Association pdiang sñiawbha ko leh ya kiwi won ki chnong wa kwah u ya embyntalang waka seiñ heiyatoh ini i thmu wa bha.
