Ka dorbar kutsnem yong ka Synjuk Waheh Chnong Jowai da pynman ya ka ha ka 15 tarik uni u bnai ha Community Hall ka Dorbar Chnong Loomsooiung, Jowai heiwa da wanrah ya i sap i tap wa da pynlut ha u snem wa dadep, da wanrah ya ka bui krehkaam yong ka Synjuk, wei da pynthymme ya kiwa kitkaam ka Synjuk ki wow kreh neibynta u snem 2022 kamjooh leh da yaklam ya kiwi ki phang wa emkaam.
Ha ka yalang da pynsñiaw ka Synjuk yei sñiawngooh wa i ekhublei ya ki kattu katni ngut ki bru kiwa da e yarap cha ka heipor wa pynkhooid ya ka Wah Myntdu, kam ya u F. War, Chairman ka JMB; u P. Kynjing, Dolloi Elaka Jowai; ka Rithelma Passah, ka Aloma Passah, ka Alomina Passah, u Philander Well Lyngdoh, Waheh Chnong Chutwakhu; u Mar laloo, Alijoice Auto; u Assistant Forest Officer, JHADC wa kiwi kiwi.
Da e khublei ko leh ya u MLA ka 2-Jowai Constituency, u Wailadmiki Shylla, uwa da e ya ka Synjuk da ka Ambulance wa kiwi ki kaam wa da yarap u ya ka Synjuk kamjooh leh ya u Deputy Commissioner, WJHD, u Garod LSN Dykes wa ki sahep (ADM) neibynta ki kaam wa boon khamtam ya ki Doctor wa kiwa kreh ha i chait i khiah ha i por wa em ka khlam COVID-19.
Kiwa kitkaam ka Synjuk neibynta u snem 2022- 2023 kam ki kamni hawah:
President: Alan Niangti, Waheh Chnong, Loompyrdi Iongpiah Jowai
Vice President: Eddie S. Shylla, Waheh Chnong Tympang Iawmusiang Jowai
Secretary: Riquoma Rq. Laloo, Waheh Chnong Panaliar Jowai
Assistant Secretary: Ryum T. Khonglah, General Secretary Mynthong Jowai
Treasurer: Dame H. Pde, Waheh Chnong Chiliangraij Jowai
Auditors: Lamphrang Pohktai, Waheh Chnong Mynthong Jowai (Convener), Titos Bamon, Waheh Chnong Khimusniang Jowai (Member), Jlan Kupar Rymbai, Waheh Chnong Loompariat Jowai (Member).
Executive Member u kynthup ki ya waroh ki Waheh Chnong ka Jowai.
Kiwa kitkaam ka Ambulance Committee:
Chairman: Daniel Dan, Assistant Waheh Chnong, Moosalyngkat Jowai
Secretary: Ryum T. Khonglah, Assistant Secretary, SWCJ
Members: President & Secretary, SWCJ kam ki Ex-Officio, Pyrkhat Shylla, Waheh Chnong Mookyrdup Jowai, Ricky Tariang, Waheh Chnong Moosalyngkat Jowai.
Neiliang u Waheh Chnong ka Tympang Iawmusiang da e khublei u ya ka Synjuk, khamtam kiwa yahkhmat ya ka wa na kipor cha kipor da yakrehlang ki waka Dorbar Chnong yong oo, khamtam heiyatoh wa i jhep wa u chrot bordiñ wa em hajan ka yung krehkaam u DC heiwa hadien wa dadep thooh u ya ki bru wow chna kam i kwah u DC, da yoh yutip wa kat na ka 17-18 tarik da kreh ki oo.
Heiyatoh wa ka thaw noh jhep da kylli da u Waheh Chnong ka Chiliangraij heiwa da pyntip wa katkam wa man katni, dang neh hi katkam i kular u DC.
