U Montri Rangbah ka jylla, u Conrad Kongal Sangma da pyntip u wa neiliang ka Ministry of Home Affairs (MHA) da pyntikna ko wow em i yachem wa u Montri Kaam Pohyung ka ri India, u Amit Shah ha i janmiet yong ka 27 tarik uni u bnai hajrong i pynbait noh ya ki thaw ha khappood wa ka Assam, hanla ka Ministry ym pu em phah ko dei thoh.
I yachem yong ki 2 ngut ki Montri Rangbah kitæ u Himanta Biswa Sarma wa u Conrad Sangma ya u Amit Shah ha ka 27 tarik da yooluti wa daw chim rai noh syndon ya ki 6 tylli ki thaw ha ka bynta kawa nyngkong na ki 12 tylli ki thaw wa ya kajia.
Hawa kylli hajrong i em na ki Hima wa ki MDC wa pyrchah ya ka MoU wa da ya soi wa ka Assam, u Montri Rangbah da ong u wa ka sorkar da dep ko wow yaklam wa kiwa boon ki khlieh synchaar ha kawa da pynsñiaw yei long i man khlem da murieh, tangwa dang em kiwa yahkhmat kiwa da pynsñiaw yei wym yahaap.
Da ong wa ka sorkar da pyrchang ko wow leh ya kawa bha tam hawa yatoh wa ini i kaam wei da sñiaw wa da toh u lai chakhamt, tangwa kitæ kiwa pynsñiaw leh, ka sorkar daw pyrkhat biang wow yaklam ha ka 27 tarik.
Hajrong i pyrchah yong kiwa chong chnong ka Malchapara kawa em ha Gizang, hapoh West Khasi Hills, u Conrad da ong u wa ki paidbah kiwa chong chnong waboon da pynsñiaw ki wa ki kwah ki wow em cha Assam wei kamwa ki 2 thaw na Gizang da pynsñiaw ki wa kwah ki wow em cha Meghalaya. Da ong u wa ym ye wow leh mar dei khangtleiñ na iwi i thaw cha iwi tangwa hap wow pynlai kamjooh.
