Heiyatoh wa i mih khubor wa em kiwa yoh ya u khñiang Human Metapneumovirus (HMPV) hapoh ka jylla Karnataka. Neiliang ka Indian Council of Medical Research (ICMR) da pyntikna ko wa da chem wa da em ar ngut kiwa da yoh ya uni u HMPV ha Karnataka wei kini waroh ar toh ki khonboo.
Ya waroh ar kini da chem deiwa leh ya ka Routine Surveillance yow pait u sylli ya ki khñiang wa pynkjut bru kiwa ktah yei riñ mynsien (Respiratory Illnesses) wei yeini toh iwa da leh da sylli ha kylleiñ ka ri.
Neiliang ka Ministry of Health and Family Welfare da ban joor ko wa u HMPV toh u khñiang wa da em ha waroh ka pyrthai deilang ka India wei kiwa yoh kjut na u HMPV da em ki ha kiwi ki ri leh.
Chooh chooh da ong wa katkam ka yukheiñ ka ICMR wa ka Integrated Disease Surveillance Programme (IDSP) Network, ym em i ku kiwa yoh yei kjut Influenza-Like Illness (ILI) næ ka Severe Acute Respiratory Illness (SARI) hapoh ka ri.
Ki khonboo wa da chem wa yoh HMPV toh kawi kawa dang 3 bnai kawa da chah sumaar ha Baptist Hospital, Bengaluru wei kawa da em chwa i chitom Bronchopneumonia. Wei da yoh ko leh wow mih na Hospital.
Iwi won toh u khonboo wa 8 bnai uwa da chah Test wei da chem wa em u ya u khñiang HMPV ha ka 3 tarik uni u bnai wei uni leh toh uwa chah sumaar ha Baptist Hospital, Bengaluru hi, wei man u leh uwa da chimtom chwa nei kjut Bronchopneumonia. Kattæ da man u uwa da sdang chait.
Ka sorkar da ban joor ko wa hap wow kynmoo wa kini ki khonboo ymtoh kiwa wan na baar ri ha iwon iwon i por.
Ka Union Health Ministry da pyntip ko wa da booddien ko yeini waroh ym du ini, tangwa waroh chi snem lada joor i poor u HMPV wei ka World Health Organization (WHO) leh da booddien ko wa ka China yow tip kammon man.
Discussion about this post