U Home Minister ka ri, u Amit Shah ynne da pynbna u yei pyrtuid yong ki le ngut ki Terrorist wa da chah siat yap ha ka Operation Mahadev ynnin ka sngi kiwa tip kam u Suleman, u Afghan wa u Jibran—kiwa man ki dkhot ka Lashkar-e-Taiba (LeT) deiwa ong wa da emkti ki heiwa jia ha Pahalgam ha ka 22 tarik u Naitung.
Hawa klam ha Lok Sabha u Amit Shah da pyntip u wa da yoh leh wow kem ya kiwa e baam wa ya kiwa yarap ya kini ki le ngut wei daw kit ya ki metyap yong ki cha Srinagar.
Da pyntikna leh wa kin toh kiwa na Pakistan da ka Voter ID wa chem na ki, ki baam Chocolate wa chna ha Pakistan wei ki tiar yaleh wa chem na ki toh ki ar jait ki AK-47 wa kawi ka M4 Carbine.
Da pyntip u wa da pynskem leh yeini da ki bru samen wa tipmit ya kini ki bru, kamjooh da ki ar ngut kiwa kem ka National Investigation Agency (NIA).
Chooh chooh da ong u wa ka Ballistic Test wa da leh ha Forensic Science Laboratory (FSL) Chandigarh da pynskem wa ki tiar wa rah ki le ngut toh kiwa pynemkaam ha Pahalgam.
Da ong u leh wa ka Operation Mahadev man ko kawa jop heiyatoh wa iwa jia ha Pahalgam heiwa 26 ngut da chah siat yap ki.
U Amit Shah da pynbna u leh wa ya ka Operation Mahadev da emkti da ka Indian Army, CRPF wa ka Jammu and Kashmir Police.
Discussion about this post