Kiwa yahkhmat ka Seiñraij Jowai wa kynthup nadooh u President, u H. Toi, u Chairman ka Arts & Culture, u Chandlok Dkhar wa u Secretary ka Arts & Culture, u L. Dkhar ynne ka sngi da pyntip ki heiyatoh wa i pynkhreh yaka Chaad Sukra 2024 kawa daw pynman haka 6 wa 7 tarik uni u bnai, kam chibynta u pynemburom yaka bei ramaw chwa u hiar rep hiar riang cha ki hali pynthor, ki kpær ki prah.
Yaka chaad sukra daw sdang hei miet ka 6 tarik da ki lehke Drama wa daw pynman ha Tpep Pale, heiwa daw sakhi yei sap i phong kiwa boon hei thoh wei pynwandur ya ki Drama.
U L. Dkhar da pyntip u wa ka phang yong uni u snem ong ko, “Kiwa tip u kohngooh yaki hukum ki adong Blai wa man i luti i suk ha pyrthai” iwa mut kam ki bru wa im ha pyrthai toh u im hok u kamai hok deiwa bood yaka hukum adong u Blai, wei lada ye u bood yaki hukum Blai daw yoh yei suk ha sla pyrthai.
Haka 7 tarik won daw sdang yaka chaad sukra na Myngkoi Loompyrdi Iongpiah heiwa u kongsan toh u Vice Chancellor ka NEHU hei emlang ka Silbi Passah, Padma Shri Awardee, ki waheh chnong waphær waphær, ka Seiñ Tyllilang, kiwa yahkhmat ka Seiñraij Ummulong, Seiñraij Shillong wa kiwi kiwa daw embynta lang heipor thang yaka charak.
Hadien i chaad na kani ka thaw daw mih yaaw won ki heipor noh chariñ sngi, wei kat dang lai luti daw chaad ki leh ha biar ka Blai neitæ won ha Iawmusiang.
Neiliang kini kiwa yahkhmat da batai ki leh wa kammon nachwa wei katni i rukom pyndep yaka chaad sukra, heiwa kani ka chaad lai lang ko chirup waka niam ka rukom neibhah da em chwa ka lehniam Thoh Langdoh.
Kamtæ da kyrpaad ya ki paidbah u poi ki ha Loompyrdi hapoh i por wa biang haka step 7 tarik neibhah daw sdang heipor 10:00 waje.
Haka chaad ha Iawmusiang leh daw em kiwa chah khut sñiawbha ki wow e yaka khubor heiyatoh waka chaad sukra.
Discussion about this post