Ki bor District ka Hailakandi District, Assam kam chibynta wow pyn jai-jai yei long i man ha khappood wa ka Mizoram, da pynuiñ ki ya ki tiar wa pynbaad ka Mizoram toh kiwa tooh da ki pulit ka Assam ha i thaw wa dang chna ya ka yingñkieñ yow lai cha ka lyngkha u Montri Rangbah wa nyngkong dooh ka Mizoram.
Ini toh hadien wa u DC ka Kolasib, Mizoram da thoh u cha u DC ka Hailakandi, Assam ha ka 21 tarik hajrong ini i chah tooh ki tiar kam ki nar rod da ki pulit ka Assam ha ka 20 tarik uni u bnai deiwa ong wa ki pulit ka Assam da pynthut ki ya ini i chna ya ka yingkieñ kawa da dep chwa wow sdang wei ini ym toh iyi iyi leh chaphang u pood.
Ki pulit ka Assam ha 20 tarik da lai ki yow phah pynsangeh yei chna ya ka yingkieñ deiwa ong wa da psiah ka Mizoram chapoh u pood ka Assam.
Tangwa ynne ka sngi heipor kamwa 6:00 waje i janmiet, neiliang ki pulit ka Assam da pynuiñ ki ya kamwa 5 Quintal ki nar rod hapoh 24 kynta wa ujor u DC ka Kolasib.
Ini waroh toh iwa da jia ha ka thaaiñ ka chnong khappood wa tip kam ka Bairabi.
Heipor wa lai pynsangeh ka Assam yei kreh da yah kamwa 200 ngut ki pulit wei ynne da wan kamwa 40-50 ngut ki pulit ka Mizoram ha ini i thaw.
Puræ leh: Ujor ka Mizoram wa pynthut ka Assam yei chna yingkieñ
