Ka Joint Action Committee yong ki seiñ wa kyntup ya ka Jaiñtia Youth Federation (JYF), All Jaiñtia Commercial Vehicles Association (AJCVA), Ri-Jaiñtia Trader Association (RJTA), Hynniewtrep National People’s Federation (HNPF) West Jaiñtia Hills District, Meghalaya People’s United Front (MPUF), Jaiñtia Students Movement (JSM) da yoh ujor ki na uwi u bru uwa pyrtuid u M. Lyngdoh wa hajrong wa dadep su poisa u ha ka Tollgate ha Ialong hadien kattu katni minit won da chah ah ka poisa u na ka FASTag.
Hadien ini, ynne ka sngi neiliang ka JAC hapoh i yahkhmat u D. Wanmi Laloo wa u Ribok Biam da lai yachem ki ya kiwa pynlai ya kani ka Tollgate heiwa da pynuiñ biang ki ya kani ka poisa.
Ka JAC da ong ko wa da mih i kylli wa latoh uwa ymtip wow ujor, kattæ donhi da kut wei hajrong ini neiliang ka Committee da kyrpaad ko ya ki paidbah wow ujor ki lada chem ki kamni wei ka JAC da kyntu ko leh ya ki paidbah wow krehlang wa ka heiwa ka JAC da jooh pynman ko ya i yakhih hajrong kani ka Tollgate.
Da kyntu ko leh ya ki paidbah wa ymtoh wow pynbaad donhi ya ka JAC wa da baam poisa ko na kani ka Tollgate khlem yoh iwon iwon i sakhi wa ki sabut.
