Ka Synjuk Waheh Chnong Ri Jaintia (SWCRJ) hapoh i yahkhmat u President yong ka, u A. Lipon deilang wa u General Secretary u B. Shylla, u Joint Secretary u T. Phawa wa ki kattu katni kiwa kitkaam wa kiwa ye u emlang, ha ka 11 tarik uni u bnai da man ko ka wow sah khana parom wa da yoh u pynyaar wei u pynskem sa kawi ka chnat krehkaam yong ka synjuk kawa da tip kam ka Iooksi Saphai Circle.
Hapoh kani ka Iooksi Saphai Circle da kynthup ya 13 tylli ki dorbar chnong, nadooh ka Dorbar Chnong Sarhen Chutwakhu hadooh Saphai. Ini man ko leh kam wow pynkhlan yei krehkaam ka Synjuk ha ki thaw khappood wa ha waroh hi ka Ri Jaiñtia wei kamjooh i thmu yong ka Synjuk yow wanrah ya ki kaam pynroi pynpaar na ki laad sorkar ha waroh ki liang kamjooh yow hikai ya ki bru yong ka thaain wow ye ki u sñiawkor yei kaamram yong i da hi wa kiwi kiwi ki buit ki laad.
Ki kaam wa ka Synjuk booh ko hakhmat wow kreh man ki waroh i thooh yarap na ka sorkar kam ha i liang pynku ya i puræ puthi, ki kaam rep kaam riang, i pynroi pynpaar ya ki yaw ki haat, i pynku ya ki thaw uiñke suwari, u yada wa u pynkhai im biang ya ka wah Kupli yow im biang ki doh um ha ka.
U thooh ki laad pynroi nadooh ki kaam paidbah kam ki sarok, ki luti syngkieñ, ki umbaam umdih, wa ki kaam samen ya kiwa chong chnong, ki laad yoh kaam yoh jaam, u wanrah ya ka chongsuk chongsaaiñ, wa u wanrah leh ya ki myntoi ya u duk u suk ha waroh ki liang wei wow yada leh ya ka ri waka jaitbru wa kiwi kiwi kiwa man ki kaam wow kreh ka Circle yong ka Synjuk.
Kamtæ da yoh leh wa u pynskem ya kiwa mihkhmat wa pura yong ka Iooksi Saphai Circle kiwa man kamni:
President- U S. Passah, Waheh Chnong Khonchnong
General Secretary– U C. Tangliang, Waheh Chnong Iooksi
Publicity Secretary– U N. Sutnga, Waheh Chnong Iooksi Umdieñling, wa 10 ngut ki dkhot wa pura na ki 13 Dorbar Chnong hapoh ka thaaiñ.
Ka kyrwoh na u President ka Synjuk Waheh Chnong Ri Jaiñtia, u A. Lipon.
