Jowai : Ha ka miet yong ka 24 tarik heipor kamwa 9:00 waje, katkam ki khubor na kiwa sakhi yei awri awra hapyrdi u Pastor Mechak Shylla wa ki tre dukan dai ja Choice Dhaba wa em ha Khliehtyrshi-Riatturiem da man i iwa joor bha.
Da ong kiwa sakhi wa kini ki soo ngut ki khynnah chynrang wa kynthai da baam ja ki jai jai khlem pynawri awra, wei wa ym em u leh khlem akor ki kamwa da kynnoh uni u pastor ha kani ka miet.
U Pastor hadien wa dep u yoo ya kini ki khynnah wa li chong ki hei thaw baam ki hadien wa dep wan sait kti ki da yeiñ u kattu katni por wow peit ya ki chwa u mih u na dukan.
Hadien kattu katni minit da psiah biang u chapoh dukan wei da khut u ya uwi na kiwa yang dukan u mih u cha lait.
Ha lait da kylli u na uni u khynnah uwa man u khon ki tre dukan wa neiyi yoh NOC ki yow chah ya kam kini ki khynnah wow psiah cha ka dukan wei wow leh khlemakor heini.
Da pyntip leh wa hadien wa uni u khynnah uwa em ha lait da kyntait u yeini i phah uni u pastor wow beh ya kini ki soo ngut na dukan, u Pastor da sdang u wow maisih maisang ya uni u khynnah da maham da pyntieñ u ya oo kat hadooh u pood wa da sai u da ka pistol (revolver) wow pynyang u ka hajan tympha uni u khynnah.
Chooh chooh heipor wa dang yania u pastor wa ki tre dukan, ki soo ngut kiwa da pynbaad u pastor wa leh kam khlemakor da mih ki napoh ini i thaw. Heini i por u Pastor da yoh laad u yaklam wa kini ki soo ngut heiwa da kylli u na ki lada ki bei ki pa yong ki tip ki namo ym tip ki wa em ki heini i thaw? Heiwa da jubab ki wa ym tip ki bei ki pa ki yeini.
Kamtæ da phah liwan yabor chwa u du ya ki chynrang katwa ya ki kynthai da phah psiah u hapoh ka kari yong oo.
Hei yaklam wa ki pulit ka Jowai Police Station da pyntikna wa katkam ki sakhi kiwa da yoh ki, uni u pastor da pynemkaam u yow pyntieñ ya uni u khynnah deiwa sai weiwa booh ya ka pistol (revolver) ha tympha yong oo (u khynnah wa dang 15 snem i rta).
Neiliang ki pulit da pyntip ki wa ym leh ki iwon iwon hei yatoh weini kat wym pu em kiwon kiwon leh kiwa booh (ujor) næ ka FIR pyrchah ya uni u bru heitoh wa sai pistol (revolver) u.
Neibhah wa hadooh ynne ka sngi ka ujor man ko leh du hei ki kyntien donhi khlem iwon iwon i thoh i taar.
Katkam wa man hachwa wow e ya kani ka khubor da tip wa da pynngat ya u pastor wa ki dhap (kiwa emkti wa oo) hapoh ki kyndon 34 / 354 / 365 ka IPC.
Heini hawah da booh leh booh ya chibynta ka video wa psiah ki soo ngut ki khynnah neitæ ya iwa lai sait kti ki katwa u Pastor dang psiah thied sikret u. Heijooh i por leh da khmiet u ki heipor wa wan sait kti ki.
Neitæ hadien kattu katni por da psiah biang u chapoh dukan heiwa da khut ya uwi na ki chongdai wow yachem wa oo ha lait.
Na liang u Wyrta kwah u pyntip wa ym em ki camera wa riñ dur ya i wa jia ha lait ka Choice Dhaba.
[youtube id=”kT_KkCUka4w” align=”center” mode=”normal” autoplay=”no” maxwidth=”1170″]
Discussion about this post