Ka People’s Democratic Front (PDF) da pynbna ko ya u General Secretary, u Auspicious Lyngdoh Mawphlang kam u kyrtong wow yakhun ya ka Election MLA ha Meghalaya ha u snem 2023.
U President ka PDF, u Gavin M Mylliem uwa man leh u MLA ka Sohra da pynbna u yei pyrtuid u Auspicious ha ka yalang paidbah kawa pynman ha Mawphlang ha ka 27 tarik uni u bnai wei da pynskem leh ya kiwa kitkaam ka PDF Zonal Committee Mawphlang Constituency ki wow kreh neibynta ka Party yow poi cha ka thong.
U Gavin hawa klam ha kani ka yalang hadien i pynskem ya kiwa kitkaam ka Zonal Committee da kyntu u ya ki paidbah wow e laad ya u Auspicious wow mihkhmat ya kani ka Constituency wow pyntikna wa ye u wan i kylla ym du ha ka roi ka paar, tangwa ha ki bynta waphær waphær kiwa toh ki bynta wa ki paidbah.
U Auspicious hawa klam ha kani ka yalang da e khublei chwa u ya ki bei ki pa, ki niakha niaman, kiwa hayung hasem, deiwa ong uwa i mih u ha kani ka kynti toh wow yakhun ya ka Election neibhah wa da lai wei da yoo u yei eh ki paidbah.
U Auspicious toh u khon ka Tioliam Lyngdoh Mawphlang wa u Aiborsing Rajee kiwa chong wa sah ha ka chnong Mawphlang, da pyndep u yei puræ ha ka kyrdan M.Sc Environmental Science na ka North Eastern Hills University (NEHU), Shillong wei da yakhun u leh ya ka Election MDC ha u snem 2019 na Mawphlang-Diengiei Constituency heiwa da rem u da kajiak spah Vote.
