Ka seiñ ki warep wa tip kam “Ka Myntdu Pynthorneiñ Farmer & Welfare Producer Organisation” ynne ka sngi da hiar pynyieñ Signboard maham ki ha Pynthorneiñ kam chibynta yow yada ya ki thaw rep kamjooh ya ka wah Myntdu kawa man kawa pyndap pynbiang yei emkaam yong ki kam ki warep.
Ha kani ka Signboard thoh ya ki kyntien khang pyrchah wow noh jhep, noh khyndaw, wow tong doh, wow sait that, wow khwe ha ki dooid, ki hali nadooh yingkieñ Myntdu hadooh Myntdu Lyngkhoi Blai.
Da khang haroh wow khlæiñ doh haki hali, ki dooid kamjooh ha ka wah Myntdu najrong wow theh dawai, wei lada em kiwa leh pyrchah, ka seiñ daw daiñ kuna ko kamwa T. 5000 hadooh T. 25,000. Ka seiñ kular haroh ko wow e mar chiteiñ naka kuna ya kiwa e yutip deiwa biang ki sabut.
Da booh yeini i maham neidaw wa yohlaad ki bru wow leh ya kitai ki kaam wa da chah ktah u khoo u kba wei chah pynjæd ki hali.
U Jurbha Phawa, Vice President MPF&WPO ong u wa i noh jhep, i pynkai khyndaw cha ki liar wa i bynta cheiliang ka wah Myntdu da wanrah bha ko i eh ya ki warep, neibhah wa heipor wa heh um da rah lut ko ya ki jhep, ki khyndaw u chyiap chapoh hali.
Kam u warep ong u, “Lym toh wa em kani ka wah, ym ye de u bood ya ki dienkjat ki waheh wa sian nachwa kiwa da e pateiñ ha i, neitæ i daw da chimkhia neibhah wada pyndap pynbiang ko ha i u khoo u kba.”
Chooh chooh ong u kamwa ka wah Myntdu man haroh ko kawa psa umbaam umdih ya ka Jowai, emkaam u em i i bahkhlieh yong waroh lang neibynta u yada wei pynneh pynsah ya ka.
Ha kani ka sngi da emlang leh u Pynshngain Rymbai President MPF&WPO, u Pyntngen Kyndait, General Secretary, u Mehi Phawa, Assistant General Secretary, u Khroo L Pariat, Adviser deilang wa ki manbei manpa.
Hadien wa dep pynyeiñ Signboard da em leh ka ngooh ka dem wa chimbynta da waroh kiwa emlang ha kani ka thaw.
