Ka Labang Nangphyllut & Pangam Raliang Area Committee (LNPRAC) chirup i yakrehlang waka Jaintia Hills Autonomous District Council (JHADC) haka 28 tarik uni u bnai da pynman ki yaka Nongjrong Labang Nangphyllut & Pangam Raliang First Cultural Meet ha chnong Lamarang, Raij Nangphyllut (Block-I) hajrong ka phang “Im ka riti ka dustur, im ka jaitbru”.
Ha kani ka sngi u Thombor Shiwat, CEM ka JHADC da man u kam u kongsan, u Lasky Rymbai, Deputy CEM JHADC kam u symbood kongsan, ha chirup i emlang u Rudaioo Tang, MDC Shiliang Myntang, u Eveningstar Teron, MDC Nongjngi, u Jesse Suiam, MDC Moodymmai Wahiajer, u Brighstar Chyrmang, MDC Jowai North, u A. Shadap, MDC Barato Mukroh, u Dr. Henri Lamin, Ex-MLA wa Montri warim ka sorkar jylla kam u bru chemphang.
Neitæ najrong ki waheh chnong naki 36 tylli ki chnong Pnar wa em ha Block-I, da emlang leh u Acting Dolloi u Prolin Samaiang, u Secretary ka Elaka Labang Nangphyllut u Wing Sutong, ki le Langdoh Chynrang waki le Langdoh Kynthai yong ka Raij Nongjrong, Raij Labang waka Raij Nangphyllut, kiwa kitkaam ka Labang Nangphyllut & Pangam Raliang Area Committee, neitæ u Chandame Sungoh, Chairman Hynñiewtrep Border Disputed Redressal Forum (HBDRF), u L. Tariang, Organising Secretary Khasi Student Union (KSU) Jaiñtia Hills, ki bru waheh ka thaaiñ ha deilang da ki spah ngut ki paidbah.
Ya kiwa mihkhmat ka JHADC kamjooh ki waheh wa da wan cha kani ka yalang da pdiang burom yaki da ki khynroo khyllood ka Raij Nongjrong ha deilang i riam tynre wa i Chaad Pastieh.
Haka yalang wa pynlai da u Comingson Dkhar, Chairman Labang Nangphyllut Pangam Raliang Area Committee, da yoh i klam pdiang na u Lin Talang waheh chnong, Lamarang, da yoh i rwai naka seiñ manbei ka chnong Lamarang naka seiñ manbei ka chnong Deiñler, ka chnong Phlang naka chnong Mowjem. Da yoh i chaad naka Raij Nongjrong, naka seiñ khynroo ka chnong Madan Nangkylla naka chnong Aitchrieh waka chnong Umsalait.
Lyngba i chaad i rwai, kiwa chimbynta da pynyoo ki chaka pyrthai yei mahajon ka riti dustur ka jylla, nadooh i riam i bait, ka ktien ka thylliej, i put i tem wa kiwi.
U Philip Talang u bru waheh ka thaaiñ uwa maad yei eh, da joo umkhmat u hawa khana u ya kattu katni i eh i khoo wa ki paaid wa chong chnong ka thaaiñ tyngkhooh ki.
Neiliang u Chandame Sungoh, Chairman Hynñiewtrep Border Disputed Redressal Forum hawa batai yaka parom tbian heiyatoh wa i mantre ki Pnar wa sah ha kani ka thaaiñ, ong u wa nadooh wa chem yaka Hima Jaiñtia ha u snem 1500 AD leh, ki Nongjrong Labang Nangphyllut da em chwa ki wei hei synchaar ki syiem Jaiñtia nadooh ka snem 1500 hadooh 1835 AD, kani ka Elaka Labang Nangphyllut Pangam Raliang em ko hei synchaar ki syiem Jaiñtia.
Ong haroh u wa katkam i thoh u Dr. SK Bhuyan, u Historian ka Assam, ki Mikirs kiwa kam hadien ki Karbi da wan chong chnong ki ha kani ki thaiñ ha u snem 1600 AD hapoh i synchaar ki syiem Jaiñtia haki sngi u syiem yong ki u Reng Bonghom.
U Dr. Henri Lamin kam u bru chemphang khana u wa ka tynre yong oo neiliang wa kha toh na Nangphyllut naka jait Muīai. Kamtæ hei klam yong oo pynsñiaw u yei maya wei sñiawkhia ya kiwa chong chnong kani ka thaaiñ deiwa kyntu leh yaki u ya maya wei wow yatylli. Heijooh i por kam kiwa ksoh yaka riti ka dustur i mantre ngait skem u wa dei yatylli yong ki, kani ka thaaiñ u uiñ biang ko cha Meghalaya.
Hachwa wa u kongsan u e u yei klam, ka seiñ Labang Nangphyllut Pangam Raliang Area Committee waki waheh chnong yong ki 36 tylli ki chnong da ekti ki ha oo ka dorkhat hajrong ka phang ,”Re-Unification of the Labang Nangphyllut Dolloiship to the Jaiñtia Hills Autonomous District Council, Maghalaya” iwa da soi daki waheh chnong wa kiwa yahkhmat kani ka seiñ.
Kamtæ neiliang u CEM, Thombor Shiwat dap u dei kmen wow yoo yei boon ki paaid Pnar wa wan cha kani ka yalang weiwa i ktien thylliej leh man i jooh najrong wa dang ksoh ki yaka ktien thylliej ka riti dustur, ka niam rukom.
Ong haroh u kamwa da jan pynman aiñ wow em noh 32 ngut ki MDC haka JHADC, 30 ngut deiwa yakhun Election arngut ki Nominated tæ kawi ka Constituency kawa daw pynkha thymme ye u man na kani ka thaaiñ.
Heiyatoh wa ka phang wa da e lyngba ka dorkhat wow pynim biang yaka Elaka Labang Nangphyllut Pangam Raliang, ong u waka Executive Committee daw chong pyrkhat ko wei u lai ko leh katkam ki kyndon aiñ khnang yow lait neiwon iwon i saja hadien. Wei ya u Acting Dolloi uwa da jied da kani ka Elaka leh ong u waka Council daw chong pyrkhat ko yow pynskem næ e i tipmit hadien wa ye u pynim biang yaka Elaka.
Da kyntu u yaki paidbah wow man ki kiwa yaichah, kiwa yatylli wei em i mynsien yakrehlang. Heijooh i por wym toh u man kiwa baam ar maloi, neibhah kani man i eh wa khroo yaka sorkar u pynbait yow pood hapyrdi ka Assam waka Meghalaya.
