Ha ka rynsan Purple Fair wa da pynman kyrpang neibynta ki bru wa duna hei doh i pran ha ka 17 tarik ha District Library Jowai, da sakhi wa ki bru wa em duna hei bor khmat, i bor chkor, i bor klam, i bor lai wa kiwi won ki jait duna tangwa lada man ki kamni leh, em won ki i yei sap wa kyrpang wei yeini da sakhi lyngba i pynyoo yong ki ya ki sap waphær waphær ha kani ka sngi.
Em napyrdi yong ki da pynyoo ki yei sap rwai, i sap wow tem wow put, i sap wow chna ya ki tiar wa boon jait, i thaaiñ i soor wa kiwi kawa man leh ka laad kamai yong ki.
Ya kini ki mar da pynyoo rong ki ha ki dukan waphær waphær wa da pynyieñ ha pchem ka District Library wei da wan chimbynta da ki seiñ namo ki Society kiwa pait wei yarap kyrpang ya kam kini ki bru, kamjooh leh ki chnat krehkaam sorkar.
Ya kani ka Purple Fair ha Jowai da pynman da ka The Composite Regional Centre for Skill Development, Rehabilitation & Empowerment of Persons with Disabilities (Divyangjan) (CRCSRE- Shillong), Meghalaya kawa haap hapoh ka Administrative Control ka SVNIRTAR-Cuttack, Odisha, Department of Empowerment of Persons with Disabilities (Divyangjan), Ministry of Social Justice and Empowerment, Government of India chirup i yakrehlang ki bor District ka West Jaiñtia Hills wa ka District Social Welfare Officer, Jowai.
Ya kani ka Purple Fair da wan sakhilang leh da u Montri thymme ka sorkar jylla, u Wailadmiki Shylla uwa man leh u MLA ka thaaiñ, chirup i emlang u Abhinav Kumar Singh, Deputy Commissioner, West Jaintia Hills, u L. Kynjing, Commissioner for Persons with Disabilities, ka Ripaia Passah, Assistant Commissioner for Persons with Disabilities, u Dr. Ram Shakal Sahani, Director, CRCSRE Shillong wa kiwi.
U Wailadmiki Shylla hawa klam da yaroh u yei kreh chitom ka CRCSRE Shillong, kawa da kreh neibynta ka jylla waroh kawi heiyatoh wow pynkupbor ya ki bru wa em duna lada toh ki laad e sikai hajrong i sap yong ki, ki thaw e sumaar wa kiwi de kiwa da pynkhreh kyrpang.
Ong u leh ya kini ki bru wa man kyrpang wym toh u pait yei duna yong ki, tang wow tipmit yei ye wa kyrpang yong ki.
Yaroh u leh yei bynta ki NGO kiwa pait ya kam kini ki bru, wei kyntu haroh u ya kiwa em i duna wow em ki i chaniah hei bor yong ki hi wei wow leh yeitæ dei skem yumut.
Neitæ kyntu haroh u ya ki wow chim kabu ya ki Scheme e yarap waphær waphær wa ye yoh na ka sorkar.
Ha kani ka sngi da saam leh ya ki tiar e yarap cha kiwa duna i doh i pran met, kamjooh leh ka Niramaya Health Insurance Card kawa kyrpang neibynta yong ki kawa ye u yoh yarap hei kjut chitom.
Discussion about this post