Ki khyllood wa da pyndep yei chah sikai soor sula bia wa tip kam ka Assistant Fashion Designer Bridal-Apparel Course ha MCSWA Skill Training Centre, Jowai deiwa kyrchaan poisa ka Meghalaya State Skill Development Society kawa haap hapoh ka chnat yong ka Labour, Employment & Skills Development ka sorkar jylla, da yoh laad ki wow pynyoo rong yaki sula bia wa pna soor hi ki deiwa pynman da ka rynsan wa tip kam ka “Bridal Bliss Spectacular Fashion Show & Exhibition” wa da pynman da ka Mihmyntdu Community Social Welfare Association (MCSWA) haka 26 tarik uni u bnai ha District Library Auditorium Mynthong, Jowai.
Chwa wow sdang ka rynsan pynyoo rong da yoh i klam pdiang klam yahkhmat naka Dr. J.N. Shullai, na u Lambormi Suchen, Skill Development Officer, WJH uwa da klam pynche heiyatoh waka Meghalaya State Skill Development Society, neitæ i klam pynche heiyatoh wa u khñiang kjut HIV na kiwa mihkhmat ka Meghalaya State AIDS Control Society wa kiwi haka yalang wa pynlai da u Ajoy Lanong.
U kongsan ha kani ka sngi toh u M.B. Tongper, Additional Deputy Commissioner ka West Jaiñtia Hills District uwa da ong wa ka karkhana pynmih sula toh kawa dawa bha haka juk katni, khamtam heiyatoh ki sula bia iwa da sakhi i pyn haka jylla ka District yong i hi leh wa ki bru yabeh bha ki yei miat dur hanla sy’at dor leh neidaw iwa chisien donhi hei im yow man iwa sah kynmoo.
Kamwa kani man ko ka laad ka kabu ya kiwa chah sikai, booh u leh i kyntu ya kiwa dadep chah sikai wow chimkhia wei wow kreh chitom yei kaam nadooh i rukom pynwandur yaki that ki sula, neitæ u pyrkhat u pait jngai leh heitæ i rukom wow man ka laad kamai ka wow neh sah lynter.
Ha kani ka sngi da saam leh yaki kor soor, ki Certificate cha kiwa da pyndep yei chah e sikai.
Haka bynta pynyoo rong yaki sula nyngkong toh ka Personal Creation Round wa da pynyoo da kiwa dep chah sikai haka Assistant Fashion Design Bridal–Apparel Course heiwa ki leh da riam ki ya ki sula wa da pynwandur da ki hi, bood saka Inspiration Round heiwa ki Model da riam da ki sula wa da pynwan dur da kiwa dadep chah sikai.
Da yoh leh saka Talent Showcase na kiwa chah sikai soor namo Tailoring yong ka WINO CAP, ka Talent Showcase Fashion Design na kiwa chah sikai yong ka Sewing Thread, neitæ da yoh ka Ramp Walk na kawa yoh yei naam Miss Jowai 2023-24, khaddooh won toh ka Final Bridal Gown Round yong kiwa dep chah sikai haka Assistamt Fashion Design Bridal Apparel.
Da pynchong chit chooh chooh ya kani ka sngi dei rwai i tem i put naka Grass Root Music Project.
Discussion about this post