Ka Thma U Rangli-Juki (TUR) da pyntip ko wa da yoh ko ki kot ki sla deiwa yaleh RTI heiyatoh wa ka Meghalaya Investment Promotion Authority (MIPA) kawa pynyoo wa ka sorkar i thmu ko toh wow wanrah ya ka aiñ yow pynchlur yei wan seiñ khih, seiñ karkhana khlem da em wa pait wa yoo yeini.
Da pyntip wa nyngkong da pyrchang ki wow pynslem u e jubab lyngba ka RTI tangwa hadien wa lai mih wei da chong da ap ar sien da u State Information Commission da sdang wow yoh ya ki kot ki sla.
Ini toh hadien wa da ki bnai wa pynslem heiwa ha u December 2024, ka TUR da yoh ko wow pait ya ki kot ki sla ka MIPA kawa jooh tip kam ka Invest Meghalaya Authority heiwa da em ko du le tylli ki File kiwa da yoh wa kynthup ya ka Note Sheet wei da booh ya kini waroh wa da yoh lyngba ka RTI ha ka Website www.hokmeghalaya.in yow ye ki paidbah u pait.
Ka TUR da pyntip wa wot u State Information Commission leh da chem chitom u wow chem yei thaw wa em ka Office ka MIPA. Nyngkong ka TUR da yachem ko wa ki kattu katni ki Consultant ki wym tip iyi iyi leh wa em ha kawi ka kamra ka Main Secretariat kiwa da khana wa kreh ki hapoh u K. Hynniewta hapoh ka Planning Department.
Da khyrngiat leh wow chem yei rukom seiñ ya ka MIPA heiwa da sdang ya ka lyngba ka aiñ wa da chna ha u February 2024 wei da mynjur ha u March 2024 khlem da ya syllok hapoh ka yung dorbar yow bichaar ya kawi pa kawi ka kyndon.
Ka TUR da ong ko wa kani ka aiñ toh kawa maa bha neibhah wa da booh yei bor ha kti ki kattu katni donhi hei pyrtuid wow pynchlur ya kiwa wan seiñ khih, seiñ karkhana hadooh wow yoh ki yei thaw ki jaitbru ri-loom neibhah kamwa man kattæ 80% ki jaitbru i toh ki wym em thaw.
Da ong leh wa kani ka aiñ da booh ko hei maa ya ka aiñ Land Transfer Act hanla daw pynkylla ka wei daw e laad ko leh ya kitu kiwa em hei bor wow pynlang ya ka spah ka phaw deiwa chim leh yei thaw ki bru wei ini daw pynman ya kiwa mahajon wow nang mahajon ki katwa kiwa dooh daw nang dooh ki.
Katkam wa chem lyngba ka RTI, ka MIPA i kaam ko toh yow pynemkaam yei thaw wa em ha Shillong heiwa da em i tyrwa wow pynheh ya u sarok Bivar Road deiwa pynkhian ya i thaw ka Ward’s Lake namo ka Nan Polok. U chim leh ya i thaw wa em ka yungmane English Service Church wa em hajan ka yung Legislative Assembly warim ha Khyndailad khlem da pyrkhat ya kiwa lai yaseiñ wei wow pynneh pynsah ya ki yung warim.
Chooh chooh ka TUR da ong ko wa hei pyrtuid kiwa kwah u seiñ khih wei wow kdong ya ka thong $10 Billion Economy, ka sorkar da pyrchang ko wow wanrah smat kiwa boon jait lyngba ka MIPA khlem da pyrkhat jngai kamjooh ya ka bei rymaw kamjooh ya ki tre chnong, i hok kiwa kreh, i kamai kajih wei ka thong ka MIPA toh iwa maa ym du ha i por wa tbian tangwa wot ki snem wa daw wan.
Ka TUR da beiñ ko yeini wa da thmu ka sorkar wow leh i wym em man katkam i synchaar paidbah, khlem da man iwa khooid wa suba wa iwa em kiwa kitkhlieh.
Kamtæ iwa emkaam toh wow yaklam yatai sani bha hawa wanrah ya ka aiñ.
Discussion about this post