Ka sorkar Meghalaya deiwa ya krehlang waka SIAL India da lai ki wow pynyoo-rong ya ki mar ka jylla ha ka VinExpo wa pynman ha Pragati Maidan, New Delhi nadooh ka 9 tarik hadooh ka 11 tarik uni u bnai.
Kani ka VinExpo toh ka yaw wow pynyoo rong ya ki jait dih Wine wa da wanrah na 20-30 tylli ki kynhun wa pynmih Wine na kylleiñ ki ri deilang wa kiwa napoh India kiwa da emlang waroh 50 ngut.
Ka R. V Suchiang, Chief Secretary ka Meghalaya da wan wai ko ya ka dukan ka ka jylla ‘Meghalaya Pavilion’ deiwa emlang u Dr. M Angamuthu, Chairman APEDA, ka Amanda Strohan Deputy High Commissioner Embassy of Canada, ynne ka sngi.
Kani ka VinExpo man ko leh kam ka rynsan wow yachem para wa pynmih Wine kiwa napoh ka ri kamjooh leh kiwa na baar ri.
Na Meghalaya da em leh kiwi ki mar wa da pynmih hapoh ka jylla da ka Kper, CountrySpices, Dalade, BEE Natural, Gabil Agro Industries, Meg Spice, MEG Tea wa kiwi kiwi de kiwa da pynyoo-rong ha kani ka VinExpo.
