Ka 6 Shnong Wah Lukha Association da pyrchah joor ko yei dai lilam (Auction) ya ka wah Lukha da ka Jaintia Hills Autonomous District Council (JHADC) neibynta wow tong ya ki dakha neibynta u snem 2020-2021.
Ini i pyrchah yong ka Association man ko katkam ka Notification NO. JHADC/MASF/M/10/2013/188 dated Jowai the 30th October,2020 kawa da pynmih da ka District Council kawa thmu wa dai lilam biang ya ka wah Lukha.
Ka Association lyngba kani ka khubor da khang ko ya kiwon kiwon kiwa thmu wow thied ya ka wah Lukha wym toh u thied ki neibhah wa ka Association ym e laad ko wow tong ya ki dakha, wei daw man ko i doohnong wa khroo ya ki lada thied ki neibhah wa da kammon kammon leh ka Association u yieñ bait ko ha ka yurim wow pyrchah ya ini i dai lilam ka Council ya ka wah.
Kam wow pynkynmoo, ka Association nadooh u snem 2018 ym jooh e laad ko ya ka Council wow dai lilam ya ka wah neibha wa ini ktah ko ya i kamai kajih ki bru kiwa myllien wow khwe dakha na kani ka wah.
Kamtæ ka Association da kyrpaad joor ko ya kitu kiwa thmu wow thied ya ka wah wow sñiawbha wym toh u thied ya ka ha uni u snem leh khnang wa ki bru wa chong wa sah harood yong kani ka wah u yoh myntoi ki na ka wah Lukha.
Ka JHADC ha uni u snem da booh dor ko T. 1,56,500 yaka wah Lukha.
Ini toh katkam ka kyrwoh wa da phah da u Daiapherbha Lamare, Secretary 6 Shnong Wah Lukha Association.
