Jowai: Ka Jaiñtia Students’ Union (Central Body) ha ka khubor wa da pynlait da u President ka seiñ, u Lawyerson War da pynsñiaw ko yei pyrchah joor hajrong i thmu ka sorkar wow kyrriah ya i yung krehkaam ka PWD Jowai North Division na Jowai cha Shangpung iwa da pynphylla ya ki paidbah khamtam ki bru ka Jowai.
Ka seiñ da ong ko wa ym pdiang ko yeini la man katwa man neibhah wa man i i leh khliehchrieh yongyi yongyi wow pynmyntoi yeiyi yeiyi khlem chim ya ka rai yong kiwa boon wa lang.
Ka seiñ da beiñ ko ya ini i rai khlem pyrkhat ka sorkar MDA, wei man i iwa khlem yurim khamtam wow kyrriah ya ki yung sorkar.
“Waroh na Jaiñtia yoo ki wa ka Jowai man ko kawa pyrdi dooh ki thaw ha Ri-loom Jaiñtia wei man ko kawa suk wow lai wow wan khamtam hawa lai emkaam cha kiwon kiwon ki chnat sorkar” da ong ka seiñ.
Da beiñ ko leh yei leh syndet yeini khlem em kawon kawon ka yalang paidbah namo ka Public Hearing iwa da pynsñiawsih ya kiwa boon.
Da beiñ ko leh ya u MLA ka Jowai u Wailadmiki Shylla wa man u uwa mihkhmat u wymhoi wei pynyoo leh wa kiwa chong chnong ka 2 Jowai ymtip ki wow jied ya uwa mihkhmat uwa raikut neibynta ki paidbah tangwa man u uwa ngaitsneiñ du yei ong kiwi khlem ye u chim ka rai yong oo hi.
Da pynrap ko leh deiwa ong wa e kani ka rai ja sorkar MDA u man ko kawa nyngkong wa kawa khaddooh.
Discussion about this post